Dende l'arribo de Colón en 1492 a las Américas sempre, s'ha conozito l'arribo de numerosos espanyolos, d'orixen aragonesi ed andalusí e tamién d'estremenyo. Pero lo que multos non saben e lo que non fió dito multo polos libros estóricos d'Espanya ha sesto la gran quantitá d'espanyolos d'orixen ed alcurnía mudéxara! Mientrestato que los moryegos muçulmanos los morescos e los mudéxares estaban sendo perseguitos baxo el reino cristiyano mayormense n'Aragón, Castilla, Liyón, Balensia, ed en tempo lógo Andalusía, los mudéxares que arribaron ad América dende Espanya, estaban fazendo una bita nuoba nelas Américas. Lo que traxeron con elos e lo que dexaron como bestixio por tós los logos de las Américas, fieron seus obranças n'arquiteitura. Ed allanda que elos xegaron d'estabelezer-se nelas Américas teberon que fazer seus bitas, baxo altra identitá, altra lingua, altra cultura, e sob de tót altra relixión. Lo que fió perdito en tempo, fió totas aquestas cosas quales en tempo se fieron perdendo ed oblidando.
Perense los seglos los mudéxares espanyolos, fieron combertitos en norse-americanos, çentro-americanos, carriberos e finalmense sur americanos. Lo que l'egrexa católica espanyola non atanxó de fazer ansí col caso de los indíxenas, fió de desabaneçer la sangüe mudéxara nelos aldures daquelos primeros moryegos, que arribaron a las Américas multos anos anteriormense! Lo que l'egrexa católica e l'ordença de Castilla non podió emborrar totalmense en nostros alhabitos moryegos americanos, fió nela xénetica d'elos allánda bisto nelas áreyas de las faxas, cabelos, piele, nasos, quales multos de latino-americanos leban, e sen conozer-lo, porque l'estória de seus antepasatos, nunca ha sesto dito ad elos xamás! ;Ed agora quantos d'elos reconoscan seu alzicro moryego, o peyor, l'esistençia d'Al Andalus?
En xeneral quan uno le pembe ad un latino-americano sob seu alzicro od alcurnía espanyola sempre la respondença ye la mesma non lo sei, pero esmaxino que yes d'Espanya, porque áquesto ha sesto ensenato a nosaltros dende alhuelindos! Áquesto tipicamense ye la respondença d'un latino-americano qual por ignorançia sabe absolutamense ries en concreto sob l'arribo moryego a las Américas. Quiçás la culpabelitá non la leben elos, pero embéga l'estória de las Américas quales seus autores nesequera, fieron moryegos ne fieron encluyitos!
Ma malgrá de tót áquesto l'alzicro moryego ha sobrebibito ed ançá agora resurxito. Ed agora máis e máis latinos nelas América ed Espanya están reconozendo seu alzicro moryego, e recollendo seu identitá perdita, relixión, cultura moryega e poquinto a poquinto ançá seus falas ançestrales de l'alchamía e l'árabi andalusí! Lo que fio una bega enconçebíbel agora ódi ye conçebíbel, el retorno a nostra cultura, relixión, e linguas moryegas. ;On está la proba od amostrança daquesto pemberán los esçéiticos, pós en tós los logos de las Américas on esisten moryegos. En Peru, en México, en Porto Rico e Cuba. Nel Salbador, ed Arxentina, Xile, Colombia, Equador, Brásil, Benezuela, tós aquestos logos e máis on multos latino-americanos con nommes moryegos como Medina ed Almanza, o multos altros con paternitá moryega, quales multos desconozen seu esistençia o semnificançia! ;Por qué? Porque l'egrexa católica espanyola allemde de l'estória espanyola fezeron tót, pa emborrar seus paternitás ed alcurnías moryegas con dando-les nommes cristiyanos, e cultura cristiyana castellana, lingua castellana e sob de tót, la relixión de la cristiyanitá! Pero la curiositá de tót áquesto ye que multos sen saber-lo latinos-americanos cristiyanos ed ançá delgunos muçulmanos empregan nommes moryegos como Fátima, Lina, Mona, Salma, Saira, Omar, Farid, Fuad, mientrestato empregan tamién seus costummes n'espresiones como "ójala, óle!" de l'árabi "inxa'allâh, allâh!" Ançá agora empregan en seus creyaçiones d'egrexas, la mesma arqueteitura moryega que fió traxito nel primer arribo de los moryegos ad América en 1492!
Daquel lonxe troço ha sobrebibito l'alzicro moryego nelas Américas. Beyeremos, que sigue bibendo nelos mudéxares d'agora nela Américas. Xá despós de 511 anos dende el primer arribo nelas Américas daquelos primeros moryegos los mudéxares a las Américas, beyemos que finalmense el resurxemiento mudéxar n'América, bibe ed atabará bibendo! Porque l'espéritu moryego en cadaguno de nosaltros bibe allánda! Non sólamense en combersos o muhalís como eu mesmo, pero tamién n'altros cuyos nommes xá non son Xesús , Xosé ma Iza e Yusef! Beyemos en México en Queretero, en Peru en Lima, l'alzicro de los moryegos alí. En San Salbador nel Salbador, La Habana Cuba, Tucumán n'Arxentina, en Nuoba York n'América, ed altros logos on por fin máis e máis l'alzicro moryego está sendo rebelato a multos, l'alzicro qual nostros antepasatos mos traxeron quasi 511 anos ante. Eu siu mudéxar ed orgulloso de seyer mudéxar, Eu Ah'med Abén Birçali, meu nomme bero!
