Deinde l'arrivo de Coloni in 1492 allas Américas sempre s'ha conosciuto l'arrivo de numerosis ispaniulos, d'origeni aragonessi ed andalussi e tamén d'estremeniu. Ma lo que moltos nun sapen e lo que nun fue dito molto pelles libros istóricos d'Ispania ha essito la gran quantitate d'ispaniulos d'origeni e stirpo mudégiar! Ossanda que les moraicos mussulmanos les morescos e les mudégiaris istaban essendo perseguitos sopra la regno cristiano maiorméns n'Aragón, Castilia, Lión, Valenssia ed in tempo depós Andalussía, les mudégiaris que arrivarun ad América deinde Ispania, istaban fassendo una lucta nova nellas Américas. Lo que portarun con ellos e lo que disciarun como vestigio per totos les locolos della Américas, fuerun suus obras n'arquetectura. Ed ossanda que ellos arrivarun de stabilitarse nellas Américas averun que fassere suus vitas, sopra altra identitate, altra lingua, altra cultura, e sopratoto altra religió. Lo que fue perdito in tempo, fue totas istas cosas qualis in tempo se fuerun perdendo ed olvisciando.
Duráns les secolos les mudégiaris ispaniulos fuerun convertitos in nors-americanos, centro-americanos, carribenius e finalméns sur-americanos. Lo que l'eclessia católica ispaniula nun atansció de fassere ossí col caso delles indigenas, fue d'evanescere la sangue mudégiara nelles descendensis dissos primeros moraicos, que arrivarun allas Américas moltos annos anteriorméns! Lo que l'eclessia católica e l'ordeni de Castilia nun possó adelere totalméns in nostros amatos moraicos americanos, fue nella ienetica d'ellos sedi visto nellas áreas dellas fascias, capellos, pelle, nasos qualis moltos de latino-americanos portan, e sini conoscerlo, perque l'istória de suus antepassatos, numca ha essito dito ad ellos iamai! ;Ed anún quantos d'ellos reconoscan suu legato moraico o peior, l'existenssia d'Al Andalus?
In ienerali quando uno le pete ad un latino-americano sub suu legato o stirpo ispaniulo sempre la resposta siaga la medesma nun lo so, pero imagino que siaga d'Ispania perque isto ha essito inseniato a nosaltros deinde parvollos! Ísto tipicaméns é la resposta d'un latino-americano quali per ignoranssia sape absolutaméns nulla in concreto sub l'arrivo moraico allas Américas! Forsi la culpabilitate nun la portan ellos, ma in vessi, l'istória dellas Américas qualis suus autoris nesivolsa, fuerun moraicus ne fuerun incluitos!
Ma malgrá de toto ísto le legato moraico ha supravivito e díu anún plú e plú latinos nellas Américas ed Ispania istán reconoscendo suu legato moraico, e tollendo suu identitate perdita, religió, cultura moraica e poco a poco díu suus parlas ancestralis del algiamía e l'árabe andalussi! Lo que fue una vessi inconcebibili anún odie é concebibili, le retorno a nostra cultura, religió, e linguas moraicas. ;Unde istá la prova o mostranssia d'ísto peterán les essécticos, pós in totos les locolos dellas Américas unde essistan moraicos. In Peru, in Méssico, in Porto Rico e Cuba. Nel Salvator, ed Argentina e Scile, Colombia, Equator, e Brasíl, Venezuela, totos istos locolos e plú unde moltos latino-americanos con nomenis moraicos como Medina ed Almanza, o moltos altros con con paternitate moraica, qualis moltos desconoscan suu existenssia o significanssia! ;Per qué? Perque l'eclessia católica ispaniula oltro de l'istória ispaniula fasserun toto per adelere suus paternitatis e stirpos moraicos con dandolis nomenis cristianos, e cultura cristiana casteliana, lingua casteliana e sopratoto la religió della cristiantate! Pero la curiositate de toto ísto, é que moltos sini saperlo latinos cristianos e díu qualcunnos mussulmanos aversan nomenis moraicos como Fátima, Lina, Mona, Salma, Saira, Omar, Farid, Fuad, estondo aversan tamén costummis n'expressionis como "ójala, óle", del árabi "inscia'allah, allah!" Díu anún aversan in suus creassionis d'eclessias, la medesma arquectura moraica, que fue tragito nel primero arrivo delles moraicos ad Américas en 14921
Daquello longe mica ha sopravivito le legato moraico nellas Américas. Vedemus que segue vivendo nelles mudégiaris allas Américas, ia depós de 511 annos deinde le primero arrivo nellas Américas daquellos primeros moraicos, les mudégiaris allas Américas vedemus, que finalméns la resurgenssia mudégiara n'América, vive e seguirá vivendo! Perque le spirito moraico in omniuno de nosaltros vive ossanda. Nun solaméns in conversos o muhalís como eo medesmo, ma tamén n'altros cuyos nomenis ia nun son Ioanni, Iussepi, ma 'Iza e Yusef! Vedemus in Messico in Queretero, in Peru in Lima le legato delles moraicos lí, nel Salvator, la Habana Cuba, Tucumán n'Argentina, in Nova Iork n'América, ed altros locolos unde per fini plú e plú le legato moraico istá essendo revelato a moltos, le legato qual nostros antepassatos nos tragerun quasi 511 annos ante. Eo sio mudégiar ed orguliós d'essere mudégiar eo Ah'mad Abén Birzali, meu nomeni vero!
