Por 511 anos dende la cadita de Granata n'Al Andalus los morescos andalusis en Magaríb prençipalmense, han forguexato atrabersando la duraçión del tempo. Sempre lebando adentro d'elos l'esbulnura duna alguaría moryega, que dende seglos ha sesto dexata, pa l'alanzár. L'estória espanyola los conozen por seyer una raça estinta, mientrestato l'estória atual los conozen por seyer magarabis e non andalusis! Nengún en beritá conosca el número atual daquelos andalusis d'Al Andalus, bibendo naquestos tempos d'agora, namáis podamos esmaxinar, que la quantitá seiga alcházima allánda. Eu esbuto, que tal béga aiga multos máis malconozitos allánda por seyer moryegos! L'esilio de
los andalusis magaribis, ataba aflexendo los córes e las recordanças de multos de los andalusis magaribis d'ódi!
Nel mes de dezembre de l'ano de 2001 s'encomençó una iniçiatiba por parse de los andalusis esiliatos en Magaríb, on l'eniçiatiba fio de fazer una alraçéla al Rey Xuan Carlos I pexendo reparaçión d'enladença feito a los muçulmanos andalusis espulsatos d'Espanya. Áquesto ha serbito de seyer en xeneral, la prençipal basa del congreso andalusi o moresco magaribi, que en l'ano de 2002, se çelebró la commemoraçión del 500 anibersario de la primera ordençá d'espulsión contra los muçulmanos polos Reyes Cátolicos del 14 de Febreiro de 1502.
Los morescos andalusis de Magaríb, xegaron col tempo d'estabelezer-se nelas çibtás de Tetuán, Chaouen, Fez, Yabala etc, e xegaron a contribuyer multo al payés magaribí, allemde d'escongar seus reparaçiones, le pixe al goberno magaribi, ed en particular al Rey Hasán II, de l'estabelezemento o creyazión dun Instito de Cultura Andalusina semellanse a l'Instituto de Cultura Maçaguita! D'achamar áquesto, seyerá de naturalmense ahabrar seu esistençia. Áquesto ye esaitamense lo que los morescos andalusis procuran d'ahimilar ed ahadrar en fin.
La cultura d'Al Andalus sobrebibe allánda, en seu música xobial ed alquibraz, qual últimamense s'ha bisto enta l'intercambeyo delgunos andalusis n'Andalusía e seus irmanos en Magaríb. Ançá seu calima de l'árabi andalusí, ye ahafato en particular nelas muhuaxas de cantigos d'agora, malgrá de tót el traxo que ha azahato. La metadura quiçás non seiga azequíbel pa multos de los aldures andalusis en Magaríb como nel caso del andalusi Muh'ammad Açúz de 78 anos d'etá ed altros, ataba la reconozença ofiçial de los morescos andalusis, ed al mesmo tempo, pexer reparaçiones d'Espanya!
El tempo de l'arrebatura enta Espanya e Magaríb reyalmense s'ha ahalato, ed agora ye el tempo on bona boluntá, se debe esprimer sob de tót. Ed el Rey Hasan II, debería pexer e máis paular sob los dereitos respeitibos de los morescos andalusis cadaguno, mientrestato que el goberno espanyolo e naturalmense el Rey Xuan Carlos I, debería de lógo, dar acollita ad aquesta soxerençia! Ma, áquesto seyerá multo pal rey espanyolo d'aticar fázilmense. D'açeitar áquesto, seyerá d'açeitar de seyer alcharamitos polos pecatos de non sólamense l'inquisiçión pero allánda máis, l'esilio ed el despollo de multos andalusis morescos de seus casas, proprietás andalusinas, en Balençia, Andalusía, e finalmense n'Aragón, on ançá ódi, las xabes de seus casas, están trobatas, nelas manos d'altros!
Lo que los morescos andalusís escongan, ye de semplésmense d'ahifar lo suyo que los pertenez, e como léxitimos alguaritos o feredores, de seu chamila terra espanyola, qual lo mesmo se senten cadaguno orgullosos, como seus compatriotas los cristiyanos espanyolos! Seu alragáz, ye Al Andalus e pa multos d'elos lo que ha ahazato ye algafurdo, e como xense semplés, queren lo mesmo que altros espanyolos teingan, seus dereitos data ad elos baxo l'alcahil de Granata en 1492, de seyer conozitos, como espanyolos andalusis.
Se el Rey Xuan Carlos I xá adumberó una sorte d'arreuta por l'espulsión de los xudíos de 1492 quan el rey bisitó el payés d'Israyel. ;Por qué alora non se faz lo mesmo colos morescos andalusis? segón diz el Çidi Açúz. "Se el Rey Xuan Carlos I pauló ante el presidense d'Israyel, lo lóxico seyería agora mesmo s'arreutara ante el rey de Magaríb, porque la mayoría de los andalusis, recalaron naqueste payés, achamó el Çidi Açúz!
Tal béga l'asunto de los morescos andalusis en Magaríb non s'embereguesse agóri, pero seu causa e seu luta, atabará ançá que un díya seigan recompensatos ed ançá reconozitos! Quiçás el goberno espanyolo ed el rey por seyer afullentatos de combersar sob l'asunto en profunditá, ahaiden seu acontedezemento d'azahar, Al Andalus ataba dando l'almarhaba a tantos e tantos aldures morescos de Magaríb. E como ha dito Tarík Abén Çiyád una bega, "Peranse, Al Andalus mos espeita!"
