© Copyright 1998 - Labagarre - All rights reserved.
|
Waxaa Abaabulay:
Hersi M. Labagarre
National University of Malaysia
|
OGAYSIIS
WAXAAN OGAYSIINAYAA DHAMMAAN DHALLINYARADA KU TIXAN WARGAYSKAN,
IN LAGA YAABO IN AANEY II SUURTA GELIN, IN AAN CADAD CUSUB SOO SAARO DHOWRKA TODDOBAAD EE FOODDA INAGU SOO HAYA, SABABO QOYS IYO KUWO SHAQO AWGOOD, SIDAA DARTEED DHALLINYARADU RAALLI HA INAGA AHAADEEN, SIDA UGU DHAQSAHA BADAN AYAAN DIB UGU SOO DIRI DOONAA CADADYADA CUSUB, HADDII EEBBE IDMO. WIXII EMAIL AH AMA MAQAALLO CUSUB AH SIDII CAADIGA AHAYD AYAA LOO SOO DIRI KARAA.
Hersi M. Labagarre
OGAYSIIS
WAXAAN DHAMMAAN AQRISTAYAASHA WARGAYSKAN OGAYSIINAYNAA, IN MAGACYADA IYO EMAIL-KA DHALLINYARADA WARGAYSKA KU TIXAN AY QARSOODI YIHIIN, DHALLINYARADAAS WAXAY IGA SOO CODSADEEN IN AAN WARGAYSKA U SOO DIRO, WAX OGOLAASHO AH IIMA AANAY SIIN, IN AAN OGAYSIISYO IYO XAYAYSIINNO KALE U SOO DIRO, SIDAA DARTEED, WAXAAN IDINKA CODSANAYAA IN AAN DHALLINYARADA LIISKA KU JIRTA WAX OGAYSIIS AH AMA XAYSYSIIS AH LOO DIRIN, QOFKII DOONAYA IN UU AQRISTAYAASHA WAX OGAYSIIYO, FADLAN ANIGA HA II SOO DIRO, ANIGA AYAA WARGAYSKA KU QORAYA E.
WAXAAN REJAYNAYAA IN LA IXTIRAAMO XUQUUQDA IYO XUSHMADDA AY LEEYIHIIN
EMAIL-YADA IYO MAGACYADA AQRISTAYAASHA WARGAYSKAN.
Hersi M. Labagarre |
|---|
|
TUSMADA WARGAYSKA |
|
NO |
BOGGA |
MAQAALKA
|
MAGACA QORAAGA |
|
1 |
BOGGA 1AAD |
ARARTA WARGAYSKA |
HERSI M. LABAGARRE |
|
2 |
BOGGA 2AAD |
WARARKA SOMALIDA |
HERSI M. LABAGARRE |
|
3 |
BOGGA 3AAD |
BOGGA QUBANAHA |
HERSI M. LABAGARRE |
|
4 |
BOGGA 4AAD |
BOGGA DOODDA IYO CILMI BAARISTA |
QASIM HERSI FAARAX FOWZI HERSI(VAICONI)IBRAAHIM MACALLIM MURSAL |
|
5 |
BOGGA 5AAD |
DIINTA ISLAAMKA |
SH.M. ABDIWAHHAB |
|
6 |
BOGGA 6AAD |
BOGGA DEEGAANKA |
QAASIM HERSI FAARAH |
|
7 |
BOGGA 7AAD |
BOGGA DHALLINYARADA |
A/LAHI BIN MUQAFA |
|
8 |
BOGGA 8AAD |
HIDAHA, DHAQANKA,.. |
HERSI M. LABAGARRE |
|
9 |
BOGGA 9AAD |
IIDHEH IYO OGAYSIIS |
HERSI M. LABAGARRE |
BOGGA 1AAD
|
|
|
Hersi M. Labagarre |
|
|
DANTII NIN AAN AQOON, MARA DUUG AH HORTEED BUU DHAMAADAA!
Waa maahmaahyo soomaaliyeed oo fac wayn, hase ahaatee, waxaa la yaab leh in aan macnaheeda soomaalida badankeedu fahmayn.
Maxaa wacay, kolka aannu leennahay, qofka aan dantiisa aqoon, maro duug ah oo dhammaatay ayuu la mid yahay ama waaba uu ka sii liitaa, waxaan uga jeednaa, nin walbow dantaada aqoon oo dabagal.
Soomaalida badankeedu danahooda waxay uga tagaan waxyaabo aan dan u ahayn dartood, taasina runtii waa wax la yaab leh.
Taas waxaa kuu caddaynaya, in soomaalida badankeeda marka aad isku daydo in aad wax tarto, waxtarkaasi ha yaraado ama ha badnaado e, laga yaabo in qofkaasi waxtarkaaga iska diido, asiga oo leh "wax ninkaasi ku lug leeyahay ma rabo, sow kii reer hebel ma aha?" ama uu yiraahdo "sow kii reer hebel daba socday ma aha" ama "sow kii reer hebel taageersanaa ma aha" waxaaba laga yaabaa in uu yiraahdo "ciddiisa ayaa reer hebel la degta ee iga daa warkiisa".
Kolka halkaas waxaa kaaga cad in ninkaasi maslaxadiisa iyo dantiisii uga tegay wax aan micna lahayn dartood, soomaalida dhexdeeda ku arki maysid laba nin oo aan isku qolo ahayn oo wax isla qabsan kara.
Hadaba maxaa taas ugu wacan? aniga waxay ila tahay in aanay dantooda garanayn, miyaanay xasuusan maahmaahyada soomaaliyeed ee leh, dantaada maqaar eyna waa loogu seexdaa.
Nin soomaali ah ayaad u soo jeedinaysaa figrad wax tar leh oo aanan asiga wax qarash ah ama howl ah uga baxayn, lagana yaabo in uu figraddaas ama waxa aad soojidesay aad ugu baahanyahay, markaas buu wuxuu uga tegayaa kaalmahaas loogu deeqay, ninkani waa reer hebel awgeed, aqristow, sow taasi la yaab ma laha, war sow soomaali oo idil gaalo uma tuugsi tegin oo maanta kuma noola gacan hoorsi iyo baryaysi dhammaantood kuwa dalka jooga iyo kuwa dibadda jooga? inyar oo ay u suurta geli waysay in ay tuugsadaan mooyee.
Kolka maxaad kaalmaynta ninka soomaaliga ahi kuu soo jeedshay u diidaysaa? jawaabtu waa in aan ninkaasi dantiisa aqoon, haddii uu dantiisa garan lahaa, wixii loo sheego oo uu hubsado in ay anfac leeyihiin reer hebel baa wada ugama tageen
Haddii aan arrinta dhanka kale ka eegno, waxaad arkaysaa rag dhallinyaro ah oo wax bartay oo maanta runtii loo baahanyahay aqoontooda iyo maskaxdooda intaba, kolkaas baad waxaad u soo jeedinaysaa in uu umadda soomaaliyeed ee dhibaataysan ugu deeqo wixii uu tari karo, wuxuu kuugu warcelinayaa, soomaalida aad sheegayso waa kuwama? wuxuu kaa sugayaa in aad tiraahdo, waa reer hebel.
Haddii aad tiraahdo, waa soomaali oo dhan, ama soomaalida qurbaha joogta, ama kuwa dhulkii hooyo jooga, hadalkaaga rumaysan maayo, oo wuxuu is leeyahay, waa ku dhagrayaa, dib dambena kuugu soo laaban maayo kaalmana haba sheegin.
Ninka jaadkaas ah, asiguna waa dantii ma yaqaan, maxaa wacay, umadaha waxa kor u qaaday waa dadaalka indheer garatadooda iyo aqoon yahannadooda, wayna ku qasbanyihiin, maxaa yeelay, haddii ummaddaadu kor u kacdo, adiguna kor baad u kici, maanta nin kasta oo soomaali ah waa liidan yahay, waxaana keenaya duruufta dalka ka jirta, dhulkan aan joogno, mushaarka ninka soomaaliga ah ama suudaaniga ah la siiyo waa barka mushaarka ninka caddaanka ah la siiyo, waxaana laga yaabaa in aan annagu ka shahaadooyin fiicannahay kana aqoon badannahay.
Qaar badan oo caddaan ah oo aan jaamicado ka soo bixin ayaa waxay qaataan mushaar midka aannu qaadanno saddex jeer ku jibaarma, taasna waxaa ugu wacan waa in dadku eegayaan, meesha aad ka timid, haddii aad soomaali tahay, waxaa la leeyahay kan dadkiisii baa baahi u dhimanaya ee kun haddii loo sheego wuu shaqaynayaa, ninka Australiga ah ama Newzilandiga ah ama Maraykanka ah waxaa la siinayaa afar kun ama in ka badan, maxaa yeelay meesha uu ka yimid ayaa meel noo ah.
Taasi waa tusaale gaaban, oo aan aqristow kugu tusayo in karaamada qofku ku xirantahay dalkii uu ka yimid iyo umaddii uu ka dhashay.Maanta Umad umad ayaa la isu kala saarayaa, qabiilqabiil waa dhamaaday, umaduhu waxay iskula dhaqmaan maslaxadoh, umadda waxaa isu haya maslaxadoh ama danoh, haddii umaddu danteeda garan wayso waxay noqonaysaa sidii soomaaliya oo kale, maro duug ah herteed bayna dhamaanaysaa.
|
BOGGA 2AAD:
MUXUU AHAAN DOONAA, AAYAHA DOWLADDA BUNTLAND?
Aug 03, 1998, Toddobaadkii hore, sida ay wakaaladaha wararku sheegeen, waxaa gobalada, garoowe, galkacyo iyo bari, laga abaabulay dowlad la magac baxday, dowladda buntland.
Waxaa kale ee ay wararku sheegeen in Madaxwayne loo doortay kornayl cabdullaahi Yusuf, Maxamad Abshirna loo doortay madaxwayne ku xigeen.
Waxaa shirkaas ka soo qayb galay dad gaaraya 300 oo qof oo ka kala socda degmooyinka iyo beelaha gobaladaas.
Shirkaas waxaa kale oo lagu guddoonshay in la aasaaso baarlabaan xubnhiisu gaarayaan 69 qof, waxaana lagu guddoonsaday in 45 casho gudohood lagu magacaabo. Waxaa kale oo la go'aanshay in magaalada Garoowe ay caasimad u noqoto dowladda cusub.
Mowqifka Reerbarigu ka taaganyihiin Dowladda Buntland
Waxaa wakaaladaha wararku sheegeen 3dii bishan Agosto in qilaaf wayni ka dhexeeyo reer bariga iyo reer garoowe, uuna ku saabsanyahay dhismaha dowladdaas iyo magaala madaxda loo doortay.
Jenaral Maxamad Abshir Muse iyo dhammaan madaxda iyo duqayda reer bari (reer Boosaaso iyo wixii soo raaca) oo uu ka mid yahay Boqor Cabdullaahi Boqor ayaa ku gacan sayray go'aannadii ka soo baxay shirka garowe, waxayna ku eedeeyeen dhowr walxaato:
1. In shirkaas ahaa mid ay Itoobiyo maamulaysay oo ay hoggaanka u haysay.
2. In shirkaasi yahay dhaqdhaqaaq siyaasadeed oo macna la'aan ah, uuna ka dambeeyo, korneel cabdullaahi Yuusuf.
3. In magaalada Garowe ee ay magaala madaxda ka dhigteen, aaney ku habboonayn arrintaas, oo Boosaaso ay mudnayd magaala madaxnimadaas, maadaama ay tahay magaalada ugu wayn goballada bari.
Jeneral Maxamad Abshir iyo Boqor Cabdullaahi Boqor waxaa kale ee ay tilmaameen, in magaalada Garowe ay tahay degmada Cabdullaahi Yuusuf sidaa ayaana looga dhigay caasimad, taasina ma aha mid reer bariga intiisa kale u cunanta. Waxaa kale ee ay ku tilmaameen shirkan, in uu yahay afduub siyaasadeed oo uu ka dambeeyo Cabdullaahi Yuusuf, uuna doonayo in uu ku afgambiyo jeneral Maxamad Abshir kaas oo ay khilaafaad xoog lihi ku dhexmareen shirkii qaahira lagu qabtay sanadkii la soo dhaafay dabayaaqadiisii, kornel Cabdullaahi wuu isaga soo tegay shirkaas, heshiiska qaahirana waxaa saxiixay madaxda kala ah, cali mahdi, Xuseen caydiid, Maxamad Abshir, Cismaan Caato iyo Qanyare.
Wararku waxay intaa ku dareen, in warka gaarowe ka soo baxay uu filanwaa ku noqday reer bariga intooda kale, siiba reer Boosaaso, dhulkaas waxaa gacanta sare leh jabhadaha kala ah SSDF iyo USP.
JABHADDA SNF IYO ITIXAADKA OO HESHIIS
NABADEED KALA SAXIIXDAY
MOGADISHU, Aug 6 1998, Wakaaladda wararka(Reuters) ayaa waxay sheegtay in, Wadahadallo socday inka badan labaatan casho, laguna qabtay magaaladaasi Ceel cadde ee gobalka gedo, oo ay ka soo qaybgaleen dad gaaraya 700 oo qof, ay Jabhadda SNF iyo Itixaadku ku kala saxiixdeen heshiis nabadeed.
Heshiiskaas waxaa labada dhinac u kala saxiixay Cali Maxamad Mukhtaar (SNF) iyo Sheekh Maxamuud Macallin Nuur(ku xigeenka hoggaamiyaha Itixaadka).
Heshiiskaasi wuxuu dhigayaa qodobadan:
1. In dagaalka labada dhinac wadaan la joojiyo.
2. In la furo waddooyinka lagana baxsho wixii miinooyin ah ee ku duugan.
3. In la adeegsado astaanta (Calanka iwm) Jabhadda SNF, si ay u matasho siyaasadda gobolkaas.
4. In dib loogu dabaqo gobolkaas shareecada islaamka.
Waxaa kale ee madaxdu isku raaceen in dib loogu kulmo magaalada Gedo, si looga wada hadlo dib u soo dhisidda jabhadaha Itixaadka iyo SNF.
SIYAASI REER LIIBIYA AH, OO XAMAR LAGU BOOBAY
Muqdishu, Aug 05 1998, Wakaaladda wararka (Reuters) ayaa waxay sheegtay, in nin dibolomaasi ah oo liibiyaan ah oo ka dhoofayay gegida diyaaradaha ee balli doogle, ay toban nin oo wata gaari hubaysan joojiyeen gaarigii dibolomaasigu ku socday, oo ahaa gaari ah nooca aan xabbaddu karin.
Dibolomaasigaas oo aan magaciisa la garanayn, wuxuu ka qayb galay qado sharaf loo qabtay madaxdii ka wada hadlaysay abaabulak maamulka cusub ee magaalada Muqdishu, wax dhibaato ah asiga lama gaarsiin, laakiin wixii uu sitay ayaa laga dhacay gaarigiisii iyo qoryihii waardiyihiisana waa la qaatay.
Gegida diyaaradaha balli doogle, waxaa maamula jabhadda Xuseen Caydiid oo dhawaan la saxiixday Cali Mahdi, heshiis dhigaya, in Magaalada loo yeelo maamul midaysn, hase ahaatee, waxaa la sheegayaa, in aanan wali gegida diyaaradaha ballidoogle kooxda maamusha, aanan hoggaan midaysan oo labada dhinac ka socda loo yeelin, sidii la filanayay.
Taas ayaana keentay, sida la sheegay, weerarka lagu soo qaaday, dibolomaasiga reer Liibiya oo ahaa ninkii abaabulay dejinta maamulka cusub ee magaalada Muqdishu.
 |
MAAMULKA CUSUB EE MAGAALADA MUQDISHO
Xuseen Caydiid iyo Cali Mahdi waxay talaadadii la soo dhaafay sheegeen in Xafiiskii Madaxwaynihii hore ee dalka Madaxwayne Maxamad Siyaad barre ee ku yiil bartamaha magaalada Muqdishu, uu maamulka cusubi u adeegsan doono xafiis ahaan, sidoo kale, sartii uu adeegsan jitay taliska ciidanka booliiska intii uu Maxamad Siyaad barre dalka maamulayay, iyaddana waxaa loo adeegsan doonaa isla howshaas.
Waxaa kale ee wararku sheegayaan, in maamulaka cusub ee magaalada Muqdishu, uu ka soo horjeedo ninka la yiraahdo Ismaan Caato, oo sida la ogyahay ka mid ah, labadii nin ee loo magacaabay ku xigeennada gudoomiyaha maamulka cusub.
Ismaan caato wuxuu ku eedeeyay maamulka cusub in uusan ahayn mid metelaya dhinactyada ay arrintu khusayso oo dhan.
Xuseen caydiid iyo Cali mahdi waxay isku raaceen in ay mideeyaan jabhadahooda si ay u difaacaan maamulka cusub ee ay magaalada ka abaabulayaan.
Wararkale oo soo baxay bishan afarteedii, waxay sheegayaan, in Cali Mahdi iyo Ina caydiid ay ku kulmeen xafiiskii hore ee Maxamad Siyaad Barre, ee loo yaqiin Villa Somalia, xafiiskaas oo waqtiga la joogo uu adeegsado ina caydiid, waxaa la sheegay in ay madaxdu isugu yimideen halkaas, ciidamo badanna ay waardiyo ka ahaayeen dhismaha xafiiska maalintii talaadada.
Dad badan oo dhegaysanayay, heesaha wadaniga ah ee laga baahinayay samaacadaha dhismahaas ku wereegsanaa ayaa halkaas isugu timid .
Waxaa wararku intaa ku dareen in Xuseen Cali Axmad loo magacaabay guddoomiyaha magaala madaxda (Muqdishu), korneel Cabdi xasan Cawaale nin la yiraahdana waxaa loo magacaabay taliyaha ciidanka booliiska (oo ah ciidan aan wali la abuurin).
Axmad Daahir Kiyar, oo ahaa sekreteerkii hore ee Ina caydiid, haddana ah sekreteerka golaha cusub ayaa wuxuu aqriyay liis ay ku jiraan 50 hoggaamiye oo ka kala socda dhammaan dhinacyada kala duwan, kuwaas oo loo magacaabay in ay xubno ka noqdaan golaha cusub ee magaalada Muqdishu.
Xuseen Caydiid iyo Cali Mahdi Waxaa loo magacaabay guddoomiyayaal, Ismaan Caato iyo Qanyarena, guddoomiye ku xigeenno. Waxaase wararku sheegayaan, in Ismaan Caato ka maqnaa shirka, uuna diidanyahay sida ay labada guddoomiye isku sheeg howsha u wadaan, waxaana dadka shirkaas indha indhaynayaa leeyihiin, waxaa laga yaabaa, in mowqifka mucaaradka ah ee Ismaan caato iyo qaar kale ay ka istaageen shirkaas uu mar labaad howshaas dhiciseeyo.
Ismaan caato, war uu weriyayaasha u sheegay, wuxuu maamulka ku tilmaamay mid aan qaanuunka waafaqsanayn, wuxuuna addun waynaha ugu baaqay in aan la aqoonsan.
Ismaan Caato wuu diiday in uu wax ka yiraahdo, kolkii la waydiiyay, in uu la dagaali doono qolyaah maamulka wada iyo in kale, wuxuuse ku jawaabay, in uu la kulmi doono qaar kale oo ayaguna ka soo hor jeeda maamulka cusub, uuna doonayo in ay istaratijiyad cusub wada dhigtaan.
BOGGA 3AAD:
Dr. Hassan Al-Turabi
XASAN TURABI XAGGEE SUUDAAN U WADAA?
Wadahadallo nabadeed ayaa waxay uga billawdeen dowladda Suudaan iyo Jabhada u dagaallanta xuraynta koofurta suudaan, magaalamadaxda dalkaasi Itobiya ee Adis Ababa.
Hase ahaatee, dowladda uu hoggaansho xisbiga aqwaanka ee uu madaxda ka yahay Dr Hassan al-turaabi, madaxwaynena uu ka yahay Cumar al-Bashiir ayaa waxay ugu baaqday jabhaadda xabbad joojin guud oo loogu gogol xaarayo wadahadalla nabadeed, looguna furayo irdaha hay'adaha caalamiga ah ee isku deyaya in ay gaarsiiyaan gargaarka iyo cuntada kumanyaalka carruurta iyo haweenka ah ee u dhimanaya gaajada.
Wasiirka warfaafinta Suudaan ayaa wuxuu war jaraa'id ka sheegay in dowladda suudaan ay ugu baaqday jabhadda xabbad joojintaas, ayna doonayso in loogu gogol xaaro wadahadallada nabadeed iyo gaarsiinta gargaarka dadka aad u dhibaataysan ee gaajada u dhimana.
Dowladda suudaan waxay bilihii la soo dhaafay la dhigatay jabhadda heshiis kan la mid ah oo ahaa in xabbadda la joojiyo si loogu ogolaado hay'adaha gargaarka in ay deeqda gaarsiiyaan gobolka loo yaqaan baxr al-Gasaal, oo gaajo xun ku qabsatay dadkii halkaa degganaa, hase ahaatee, heshiiskaasi wuu bililiqoobay.
Nimanka jabhadda u hadlay waxay sheegeen, in warka dowladda khartuum ka soo yeeray uu yahay, dhoolla tus siyaasadeed.
Jabhadda Mucaaradda Dowladda Akhwaanku ka talsho ee Suudaan, ayaa ayaduna waxay Qaahira ka sheegtay, in baaqaas dowladdu ku dhawaaqday uu yahay dhoollatus siyaasadeed, maxaa yeelay, haddii ay nabad raadis yihiin, waxay ku dhwaaqi lahaayeen, dagaalka oo la joojiyo dhammaantiis, ee kuma dhawaaqeen, xabbad joojis ku meel gaar ah, sidaa waxaa sheegay, Sulaymaan Bakhiit, guddoomiyaha Jabhadda mucaaradka suudaan.
Suudaan waxaa xukunkeeda la wereegay xisbiga akhwaanka ee uu hoggaansho Dr. Turaabi toban sano ka hor, kadib markii ay afgambiyeen xisbigii Sadiq al-Mahdi ee la soo doortay, Dr. Turaabi waa nin aad wax u yaqaan oo khibrad dheer leh, wasiirka caddaaladda ayuu ahaan jiray waagii Numayri waddanka haystay, hadda asiga ayaa xisbigu ka qalin daartaa, waxaa la rumaysan yahay in madaxwaynaha runta ah ee dalkaas uu asiga yahay, Cumar al-bashirna uu caleema saar yahay.
Suudaan sidii xisbiga Turaabi u qabtay, dhibaatooyin badan oo xagga arrimaha dibadda ah ayaa soo waajahay, America iyo Masar labadaba colaad siyaasadeed baa ka dhexaysa, maraykanka ayaa ka joojiyay macaamalada lacagta doolaarka in laga adeegsado dalkaas suudaan,
taasina waxay keentay in aan dalkii wax ganac ah la yeelan karin umadaha kale, sidoo kale, dadka reer suudaan ee dibadda jooga sidii soomaalida oo kale in ay haajiraan bay billaabeen, ayaga oo ka cararaya xukunka xisbigaas ikhwaanka ah, dadka dalkaas u dhashay ee dibadda ka shaqeeya waxaa laga qaadaa canshuur la yiraahdo sekada kunturaadda, oo laga wado seko laga rabo kunturaadda uu dibadda kaga shaqaysanayo oo uu la gelayo dowladda uu ka shaqeeyo, waa wax la yaab leh, waligeen ma maqal seko laga qaadayo kunturaad.
Waxyaabahaas iyo waxyaabo kale oo badan ayaa waxay dalkii u soo jiideen dhibaatooyin aan dhammaad lahayn, suudaan waa dal faqiir ah, mana aha dal hardan geli kara oo dowlado waawayn la loolami kara, sidaa darteed, waxaa Dr. Turaabi iyo xisbigiisa loo qaatay in ay cagaha dhulka dhigaan, dalkana tukubiyaan, tabartoodana ogaadaan.
Madaxwayne Clinton
MADAXWAYNE CLINTON MUXUU DAMACSANYAHAY?
Madaxwaynaha dalkaasi Maraykanka Clinton, ayaa wuxuu damacsanyahay in uu ka warramo arrinta lagu soo eedeeyay ee la xiriirta baashaalka uu la baashaalay gabadha la yiraahdo Monica Lewinsky, bisha tan Agosto 17 keeda, asiga oo warkiisa ka sheegaya guddiga garsoorayaasha ah ee madaxa bannaan, ee arrinta gabadhaas iyo madaxwaynaha ku howllan.
Arrinta ka hadlidda xiriirka Clinton iyo gabadhaas ee uu madaxwaynuhu damacsanyahay waxay ku soo beegantahay laba maalmood ka hor, inta aan la qaban xafladdiisa sanadguuradii dhalashadiisii 52aad, sidoo kale, waraysigaas ka dib waxaa ku soo beegan doorashooyinkii aqalka cad qabanayay ee kala barka xukunka Clinton.
Sidaa darteed, qubaradu way la yaabanyihiin, waxa uu kilinton uga danleeyahay, hadalka furan ee uu sheegay in uu ka dhihi doono guddiga garsoorayaasha maadaxa bannaan hortooda.
Lataliyayaashiisu waxay ku waansheen in uu afkiisa qabsado, oo iska daayo wixii wararka iyo wargaysyadu sheegaanna uu dhegaha ka xirto, hase ahaatee, wuxuu ku madax adaygay in uu warrami doono.
Qubarada siyaasadda iyo kuwa qaanuunka qaarkood waxay aaminsanyihiin in Clinton arrintaas siyaasad uga danleeyahay, maxaa wacay, haddii uu hadlo wuxuu si cad u dhihi doonaa "aniga iyo gabadhaas wax inaga dhexeeyaahi ma jiraan" taasina waxay keenaysaa in la is barbar dhigo warkiisa iyo warka ay gabadhu sheegtay, halkaas waxaa imaanaysa in asiga iyo gabadha la isu miisaamo, dadwaynaha maraykanka boqolkiiba 34 oo kali ah ayaa waxay rumaysan yihiin, in warka ay gabadhaasi sheegayso uu wax la rumaysan karo yahay, boqolkiiba 65 waxay rumaysanyihiin in madaxwaynuhu nin naaga jecel yahay, hase ahaatee, uu shaqo fiican dalka ka qabanayo, kolka taasi wax dhibaato ah lama laha iyaga, boqolkiiba 45 waxay rumaysanyihiin in aan waxa ay gabadhaasi sheegayso la rumaysan karin.
Laakiin qubarada qaarkood waxay rumaysanyihiin in arrinta uu madaxwaynuhu damacsanyahay ee ah ka hadlidda guddiga garsoorka madaxa bannaan ay tahay arrin aan habboonayn, maxaa yeelay, inkasta oo laga yaabo in uu madaxwaynuhu xag siyaasadeed uga faa'iidaysto, arrintaasi xag qaanuun kuma habboona.
WASIIRRO MOOTOOYIN KU SOCDA
Dalkaasi Tailand ayaa waxaa dowladdiisu ka codsatay golaha wasiirrada in ay adeegsadaan mootooyinka booliiska si ay u yimaadaan shirarka iyo kulannada lagu qabanayo golaha baarlabaanka dalkaas.
Taas waxaa keenay, cariiriga iyo jucuurka ka jira waddooyinka dalkaas tailand caasimaddiisa Bangkok.
Wax ka qabashada cariiriga waddooyinka Bangkok waxay ahayd qodob muhiim ah oo xisbiyadu ballan qaadaan kolka ay doorashooyinka isu soo sharraxayaan, nin kasta oo soo booqday magaaladaas wuxuu khibrad fiican u leeyahay cariiriga magaaladaas ka taagan ee baabuurtu ku hayaan waddooyinka magaalada.
Ra'isal wasaaraha dalkaas Tailand ayaa wuxuu toddobaadkii ina soo dhaafay amar ku baxshay in wasiiradu adeegsadaan mootooyin, maxaa waacay, waxay u suurta gelinayaan in ay baabuurta ka soo dhex dusaan kolka ay degdegsanyihiin, sida mararka ay shirarka ka qayb gelayaan.
Wuxuu yiri, dhowr jeer ayaa qaar badan oo golaha wasiirrdada iyo xubnaha baarlabaanka ka mid ahi ka baaqdeen shirarkii, ayaga oo ku marmarsimoonaya, cariiri baa waddadii nagu qabsaday.
MATAANO U DABBAALDEGAY SANADGUURADOODII 106AAD
Dadka deggan dalkaasi Japan-ka waa dad aad u shaqo badan aadna u dadaal badan, dadkaas qaar badan oo ka mid ah waxay seexdaan waxna ka cunaan goobaha shaqadooda, dowladda dalkaas ayaa waxay in badan ku waanisay dadka in ay shaqada iska yareeyaan oo ay nastaan, hase ahaatee qofi dheg jalaq uma siin.
Kolka tolow, ma laga yaabaa in shaqa badidaas iyo dadaalkaasi ay cimri dheeri leeyiyiin, nimankii badmareennada ahaa ayaa waxay sheegi jireen, in ay soo arkeen, dad in yar hurda, oo in badan cibaadaysta, wax yarna cuna, in badanna noolaada.
Toddobaadkii la soo dhaafay laba mataano ah oo u dhashay magaalada Nagoya oo la kala yiraahdo Gin Kanei iyo Kin Narita ayaa waxay u dabbaal degeen sannad guuradoodii 106aad, waxaana wararku sheegayaan in ay yihiin, inta la ogyahay, labadii mataano ugu cimri dheeraa.
Waxay dhasheen baa la yiri, 1 August 1892kii, miskiinka erayadan qoray, ayaa mataan ah, oo dhashay 1962kii, labadaa mataanaha ahi waxay aniga iyo mataankayga naga wayn yihiin 70 sano, aabbahayna waxay ka wayn yihiin 17 sano, kaas oo dhashay 1909 walina nool.
Xisaabi xil ma leh, ee haddaba soomaali iyo Japan waa midkii hara!
Dowli waa qurac, ama waa qabo, waa midkii qaya!!
QARAXYO KA DHACAY KENYA IYO TANZANIA
In ka badan 80 qof ayaa lagu dilay, dad aan xisaabnayna waa lagu dhaawacay, laba qarax oo aad isugu dhawaa, kana dhacay, labada magaala madax ee dalalka deriska ah, Kenya iyo Tanzania.
Qaraxyadaas, waxay dheceen maalintii shalay ee Jimcaha tobankii iyo soddon iyo shan daqiiqo kolkii ay ahayd saacadda afrikada bari, waxayna qaraxyadu ka dheceen, meelo aad ugu dhawaa safaaradaha maraykanku ku leeyahay labadaa dal.
Dadka dhaawacmay waxaa ka mid ah baa la leeyahay, safiirkii maraykanka u fadhiyay Nairobi.
Dhismihii safaaradda maraykanka ee Nairoobi waxaa la sheegay in uu si xun u burbiray, saro badan oo halkaa ku yiil oo u badnaa meelo ganacsi ka socdo ayaguna si layaab leh bay u burbureen.
Dadka dhintay iyo waxa dhaawaca ah, cadadkooda ilaa iyo hadda cid run ahaan u garanaysa ma jirto.
Waraku waxay isla dib dhaafayaan in duullaankaas ay ka dambeeyaan dowlado muslim ah, sida Eran, Sudan, Liibiya iyo Ciraaq.
Idaacadda CNNta ee Maraykanku leeyahay ayaa hadalkaas buufinaysay, inkasta oo aan la ahayn wax caddaynaya in duullaankaas argagixiska ah ay dowladahaasi ka dambeeyeen.
Madaxda dalka maraykanku waxay judhiiba farta ku fiiqeen oo tuhun u jeedsheen, dadka muslinka ah ee dalaka aan soo sheegnay u dhashay iyo dowladahooda.
Toddobaadkii la soo dhaafay, waxaan aqristayaasha u soo gudbinnay warbixin uu inooga soo diray nin aqristayaasheenna ka mid ah oo jooga nairobi, warbixintaas oo ku saabsanayd duruufaha siyaasadeed ee ka taagan dalka Kenya, iyo Qilaafka diimeed ee ka jira dalkaas, waxaan mar labaad halkan ugu soo bandhigaynaa aqrista yaasha warbixintii aan fidinnay toddobaadkii la soo dhaafay, si ay u qiyaasaan halka ay u dhuranayso, xiisadda ka taagan dalaka Kenya iyo Tanzania.
MAXAA U DAMBEEYAY KEENYA?
Waxaa Qoray:
Cabdalla Rashiid (ilyaas)
NIROBI, KENYA
Khamiis, 30 July, 1998
Asalaamu calaykum waraxmatulaahi wabarakaatuhu.
salaan kadib walaal aad ayaan u wanaagsanahay adinkana sidaas iyo si
ka wanaagsan ayaan ilaahay idiinka rejaynayaa.
Walaal waxaan saakay istusay inaan idinla socodsiiyo waxyaabihii ugu
danbeeyay ee kadhacay kenya gaar ahaan umuuraha muslimiinta.
1. walaal sida aad lasocotaanba nin yahuudi ah oo dhalashadiisu tahay
maraykan ayaa waxuu kahadlay meel fagaara ah oo kutaala magaalada
nakuuru ee caasimada gobolka rift vailey kenya, sidoo kalana wuxuu qaybiyay waraaqo, arimaha ugu waawayn ee uu kahadlay waxay ahaayeen inuu nabiga salalaahu calayhi wasalame uu caayay aniga oo isku dayi doona inaan waxii uu kahadlay oodhan idiin soo gudbiyo ayaan hadana hada idiinsoo gudbinayaa qodob kamid ahaa qodobadii uu kahadlay kaas oo uu yiri nabi maxamed wuxuu kazinaystay xaaskii wiilkiisa.
arintaas muslimiinta wadanka oodhan ayay kacadhaysiisay waxayna keentay in uu wadanka guud ahaan kadhaco banaan bax kaas oo lagag soo horjeedo faragalinta diimeed ee uu maraykanku wado.
waxaa kamid ahaa ereyooyinkii kuqornaa boodhadhkii ay muslimiintu wateen "LET AMERICAN LEAVE ISLAM AND
MUSLIMS ALONE".
Arintaas kadib waxaa dhacday sidii aad mudaba lasocoteen in dhul
kudhagan masaajidka jaamaca ah ee nayroobi ay isku haysteen muslimiinta iyo ganacsatada dhulkaas iska leh waxaaad lasocoteen in arintaas madaxwaynuhu soo dhexgalay oo uu u xagliyay gaalada sikastaba arintu ha ahaatee waxaa dhacday in dawlada hoose iyo ganacsatadii is afgaran waayeen kadibna dawladii hoose ay bilaaben inay qaybkamida dumiyaan isla maalinkii kuxigtay
ay meeshii gubatay iyada oo aan la garanayan wax gubay.
Isla markiiba gaaladii waxay yiraahdeen muslimiinta ayaa dumisay waxayna bilaabeen inay dhagxeeyaan masaajidkii jaamaca ahaa ilaa shalay galab dagaal daran ayaa kadhexsocday muslimka iyo gaalada gacanta sarana waxaa lahaa muslimiinta waxase hada jirta cabsina laga qabaa inay gaaladu isku dayaan inay gubaan masaajidka jaamaca taas oo keeni doonta jawaabo aad u kharaar ilaa xalayna
muslimiintu heegan ayay kujireen waxaanan rajaynaynaa ina ay
kudhamaandoonto sida khayrku kujiro, intaasi waa wixi war ahee ilaa xalay soo kordhay.
Waxaa kaloo jirta in isla shalay uu dagaal baani dhexmaray xubnaha
baarlamaanka wadanka kaas oo laftiisu lahaa waji diimeed waayo markii
ay afka isdareen laba xubnood oo katirsan xisbiga mucaaradka ee SAFINA (ilyaas shiil iyo kayanaan) iyo xisbiga kale ee NDP oo ubadan gaalo ayaa waxya kaliftay in arintii isu badasho muslim iyo gaalo.
marka hada waxaad moodaa in wadanka ay kabilaabanayso iska hor imaad diimeed.
Waxaan warbixintan idiinkusoo gudbiyay si aad ula socotaan dhabta jirta aydaana ugu qaldamin war isgaarsiinta shisheeyahah iyo inaad ugu yaraan u gudbisaan dadka kale ee muslimka ah.
BOGGA 4AAD:
BOGGA DOODDA IYO CILMI BAARISTA
Daraasadan cusub wuxuu qoraagu ku indha-indhaynayaa, arrimaha la xiriira mustaqbalka soomaalida, duruufaha adag ee ku horgudban iyo qabanqaaba xumida soomaalida maanta.
Waxaa Qoray:
Ibrahim Macallim Mursal
Esdoornstr. 20, 7151 ZA Eibergen, Nederland
SOOMAALI YAA U SAHAN AH?
Haddaba , haddi aynu is weydiino Soomaali yaa u sahan ah? Halgamayaashii xornimada u soo dagaalay aan niraahdo, hoggaamiyaashii Jamhuuriyaddii Kowaad iyo tii labaad oo fursad weyn u heleen in door wax ku ool ah ay ka qaataan, in ay Soomaaliya ka dhigaan dal Casri ah, laakinse ku fashilay doorkaas.
U celiyayne Soomaaliya casrigii mugdiga: Nolol bidaa'i ah, nolol Dowlad laawe ah, nolol beelo iyo reero dib loogu celiyay.
Taasi waxay dhacday markii kuwaasi ay ahayeen kuwo maskax ahaan iyo jir ahaanba aan wax ku ool noqon kareen. Waa mar ay lahaayeen mustaqbal iyo rajo nolol barwaaqo ah ay higsanaayeen.
Hadda oo la waayeeloobay, maskaxdiina aysan fakar dheer geli karin, caqligiina ceeryaamo soo dul degtay, jirkiina wajac iyo wayahu miririyeen, xaggebaa la filayaa in ay reerka ku furaan? Waa su'aal maskaxda iga wareerisay. Intaas waxaa dheer waayeel mustaqbal uma harin, qorshe dheer oo dal iyo Qaran lagu dhisane ma sugi karaan.
Marka yaan lala yaabin marka dooddu ay tahay maxaan maanta helayaa. Ma madaxweynaa la ii oggolyahay mise Ra'iisul Wusaare ama...ama... Haddaba siddeedii sano ee ina soo dhaaftay waxay isku horfadhiyeen "MAANTA MAXAAN HELAYAA? Haddaba ma dhihi karnaa sideed sano ayaan ka soo gudubnay? Mise weli maalintii ayaanu joognaa.
Aniga kolley iima muqato waxaan ahayn maalintii kowaad oo musiibadan nagu habsatay, doodii xukun doonka halkii ay ka bilaabatay ayey weli joogtaa.
CIDNA UMA MAQNA, CEELNA UMA QODNA
Rukumada dhaqankeenna waxaa ugu waawayn xushmadda waayeelka, tala ka qaadashadiisa iyo ka ducaysigiisa. Runtii, waaya aragga iyo rugcaddaaga waa umadda lafdhabarkeeda, waa haddii uu doorka uu leeyahay ku qanacsanaado.
Laakiinse waayeelka aan saluugsanahay waa ku gaar ah, oo kartidiisu inta ay la eg tahay la soo taabtay, natiijadii wax qabadkiisuna ay tahay midda aan maanta ku nool nahay.
Qofku hadduu da' noqdo, wuu daciifayaa, sidaas awgeedaana "hawlgab" loo hindisay. Waayeelka kaalintiisu waa, in uu u bannayo jiilka isaga xiga gudashada xilkooda iyo sidii ay waajibaadkooda gacanta ugu dhigi lahaayeen.
Hase yeeshee arintaasi waxay ka suurtowdaa waayeelka marki isaga arintu joogtay, xilkiisana uu si wanaagsan oo hufan u soo gutay, diyaariyayna ciddii isaga beddeli lahayd oo uu amaanada ku wareejin lahaa.
Laakiinse waayeelka aan ka hadlayno waa mid kaalintiisii soo gabay markii uu tamarta lahaa, cid usha uu u dhiibtana aan diyaarsanin. Hadda ayuu is leeyahay ka gaarsii oo hoggaankii ku dheggan yahay oo mustaqbalka kalsooni kuma qabo. Waa sakaraad oo umadda ayuu ku dul rafanayaa.
Waa kaa haddane "dad cun" nimo ku darsaday. Soo ILaahey kuma dhihin Quraanka:"Ilaahey waa kan isaga idinka abuuray daciifnimo, Daciifnimo dabadeedana xoog idiin yeelay, Xoog dabadiisana daciif idika yeelay iyo gabow .. (aayadda 54aad ee Suurat ARRUUM)". Wuxuu aayad kale ALLE ku yiri Quraankiisa: " ... Alle ayaan idin abuuray, waane uu idin oofsan, kuwa idinka mid ahne waxaa loo celin cimriga kan ugu liita (oo la gaarsiin) si uusan u garan waxba, cilmi dabadiisa.(Aayadda 70aad ee Suurat An Naxl)".
Haddaba daciif iyo gabow ka sokow kuwaa Ilaahey khaliifda ka qaadaa oo waaya aragnimada, aqoonta iyo garaadka intaba ALLA ka qaadaa. Oo xattaa inta ay meel fariistaan, sida la arki jiray, talana kugu biirin karaynin.
Somaaliya odayaal waayeeloobay waa ay ku dhan yihiin, lakiinse waa kuwa lagu hungoobay. Ma aysan noqon kuwa inta meel ay fariistaan jiilka cusub tilmaaama, qaladaadkii iyagu ku soo burbureenna kaga diga.
Haddii aynu isdhihi lahayn odayaashii degaannada oo lagu ogaa xallinta khilaafaadka beelaha dhexdooda ka dhaca maa loo ciirsado, kuwaasine horay ayaan u soo dubannay.
Xilliyadii isticmaarka iyo Dowladihii Waddaniga ee maamulka Dalka isaga dambeyay oo shaqaale ka dhigtay ( oo saraakiil Dowladeed noqdeen ee horay ma u maqashay "Dug Sarkaal?"); heybaddii iyo kalsoonidii bulshada dhexdeeda ku lahayeen sidaas ayay ku gabeen. Arintu waa: Cidna uma maqna, ceelna uma qodna.
[Waa socotaa...]
Fowzi Herzi (viaconi)
Accugraph Corp
Toronto-Ont,
CANADA
Modern Somali coastal towns
Until the late nineteenth century the history of horn of Africa is essentially the history of the great Somali expansion from the north, and of the rise and decline of Muslim emporia along the coast. The movements in the hinterland did not accomplish the gradual enlargement of their territory by the Somali only, nor were events on the coast without their effect in the interior.
Certainly the evidence at present available leaves no doubt that the gradual expansion over the last ten century of the Hamitic Somali from the shore of the Gulf of Aden to the plains of Northern Kenya is one most sustained, and inits effects, far-reaching movements of population in the history of North-East Africa.
Whatever those people originated, the Arabs were first people allocated in the Somali coastal town and it is a necessary to consider first the early phases of Arab settlement along the Somali coastal town. At the some era, indirectly if not always directly, the absorption of Arab settlers seems to have precipitated, the movements of Somali expansion.
There is a little doubt that Arabian penetration along the northern and southern Somali coats is a great antiquity. It probably antedates the Islamic period; and certain shortly after the hegira Muslim Arabs and Persians were developing a string of a Somali coastal settlement.
Typical of these centers of Arab influence in northern Somali are the ancient ports of Zeila and Berbera. Zeila first appears in the record of the Arabs geographers the end of ninth century. This town was politically the most important of the Arab settlements in the north and owed its economic prosperity, at times considerable, to its geographical position as one of the chief ports of the Abyssinian hinterland in the trade with Arabia and the Orient.
Zeila was originally the center of the Muslim emirate of Adal, part of the state of Ifat, which lay in the plateau region of eastern Shoa. Berbera, however, conserves the name in classical times to the northern coast as whole, is probably of similar antiquity, but its history is much more obscure; it is first mentioned by Arab geographers in thirteen century.
Thereafter, beyond the fact that during the period of Portuguese domination in the Red Sea the town was sacked in 1558 by Saldanha, little is known of its history until three century ago. Similar obscurity surrounds most of the history of the ancient port of Mait, on the eastern coast in Erigavo district, and one of the principal centers of early Somali expansion.
While these northern Somali coastal centers were developing, Arab settlers were opening, or consolidating, a similar series of ports in the south. Of these the most important were Mogadishu, the so-called present the nation/s capital, Brava, an Merca- all commercial towns largely dependent for their property upon the entropy trade between Abyssinia, Arabia and the market of the East. Thus, in both the north and south, by the tenth century a ring of coastal emporia had been created, largely as a result of Arab enterprise, and through these ports Islam and Arab trade had gained a foothold which, consolidated and strengthened in succeeding centuries, was to become the foundation for Muslim expansion in North East Africa.
Late sixteenth century, it commenced European interest in Somali coastal towns. Over century, both north and south Somali coastal towns were established and maintained a central states and were both incorporated in the Ottoman Empire. In 1854 circa Richard Burton visited in Somali coastal towns. By the time Zeila and Mogadishu was independent Muslim principality and governed by Ajuran and Geledi in the south and Hajji Sharmarke by north Somali coastal towns mainly Zeila. While in 1855 Zeila and Mogadishu continued the coastal tradition of instituted authority under a Somali governor.
The governor for Benadir coast as a whole was stationed at Brava, which compared with Mogadishu impressed Gullian with its prosperity, Thus the city of 5,000 souls, was effectively led by two personages, one a Somali and the other an Arab who spoke some western languages. The Western partition of Somali territory as whole took place in Coastal towns. French, British and Italian colonial competition in Somali Territory took place…To a large extent the coastal and hinterland traditions had merged, and the center of political pressure had swung from the coast to the interior.
The new external links between the coast and the outside world, served in the following decades of the nineteenth century to pave the way for a new colonial impact in which the pressure was mainly from the coast towards the hinterland….
Qasim Xirsi Faarax
M.A. Qaanuunka iyo Shareecada
International Islamic University (Malaysia)
MIYAAN IS SHABAHNAA INAGA IYO YUHUUDI?
Sida ka muuqata dadkeennu waxay u arkaan in qisooyinka cibra qaadashada leh ee ku soo arooray Qur'aanka ay yihiin taariikho iyo waabaa waxaa jiri jiray, taas oo ku dhisan ku tiri ku teen iyo sheekooyin la isku maaweeliyo.
Sidaa si la mid ahna waxay u maleeyaan in cadaabka la sheego uusan asal ahaanba ka dhici karin Adduunkan ee uu ka askumo uun isa soo bixinta dambe iyo is xisaabinta Aakhiro oo keliya, taasna uu dambigeeda iyaga ahaan Alle isaga dhaafayo maadaama ay ku dhasheen Islaanimo.
Waxay kale oo aaminsan yihiin in Aayadahan Qur'aanku ay ku soo degeen dadyow aad u ahaa axmaqiin oo waxay ku dhaqmayeen aan ilaa hadda wax ku dhaqmay iyo wax ku dhaqmi doonaa jirin is kaba daa in ay iyaga Soomaaliya ka dhacaane.
Waxaas oo dhamina waxay dhaxalsiisay in ay dadkeennu isu arkaan kuwa Adduunka ugu qaalisan, uguna saxsan aysanna suurtoobi karin inay qaldamaan sidaas darteed markay arkaan Aayad Qur'aan ah oo ka hadlaysa Qoon xumaan falay ka dibna Alle ka aaray waxay ka qaadaan qosol iyo jees jees iyaga oo leh dad xun bay ahaayeen.
Waxaana laga yaabaa in kan sidaas lihi uu faraha kula jiro xumaano iyo fal dambiyeedyo kun jeer ka sii xun tuu Eebbe ku halaagay Qoladaas oo ka dhigaysa iqarso, waxaas oo dhanba tan inooga daran ee na haysataa waxay tahay horta hanala halaago ama cadaabee ma nahay kuwa fahmaya ama dareemaya cadaabkaba?.
Intaas haddaan uga gudubno fikradahaas gurracan ee aan iska tusinay maskaxdeena, tixraaca dambana aan ku lahayn caqliga fiyow iyo kitaabka Alle toona, bal aan isku dayno in aan ka jawaabno oo xal u helno fikradahaas gurracan.
Waa midda hore ee Aayadaha Qur'aanku dhammaantoodba waxay quseeyaan oo la hadlayaan waa innaga, oo marka ay ka waramayaan Qolo hore iyo falalkoodii waa digniin iyo tusaalayn naloo kugu caqli celinayo ama naloo kugu caga juglaynayo, waxaana loola jeedaa falkaas ayey ku xumaadeene iska jira idinku oo haku dhicina dabinkii ay ku dheceen.
Haddaba Aayadda ku soo degtay Fircoon waxay la hadlaysaa oo warka u jeedinaysaa mid kaste oo naga mid ah kuu doono ha ahaadee.
(Waa Socotaa...)
F.G:
Waxaan ugu bishaaraynaynaa Aqristayaasha bogga doodda, in aan billaabi doonno fidinta daraaso cusub, kolka midda hadda socota dhamaato, daraasadaas oo cinwaankeedu yahay (MADAXWAYNE HA LAYGA DHIGO) Waxaa qoray Qaasim xersi Faarax, waa isla qoraagii aad hore u aqrisateen daraasadiisa hadda socota. Wuxuu qoraagu daraasadan mar labaad isku deyayaa in uu si qayaxan u soo ban dhigo waxyaabaha ka guuxaya maskaxda soomaalida iyo figradda ay ka haysato madaxwaynanimada.. Aqristayaasha boggan waxaan ka codsanaynaa in ay ina soo siiyaan wixii talo ah, inta aan daraasada cusubi billaaban. Wixii munaaqasho ah ama sixid ah albaabbadu waa u furanyihiin. Labagarre.
BOGGA 5AAD
SHIRKIGU WAA MAXAY?
Waxaa Qoray: Sheekh Maxamad bin Cabdil Wahhaab
Waxaa soomaaliyeeyay: Hersi M. Labagarre.
CASHARKA 11AAD
ILAAHAY XAGGIIS WAX LOOLA BAXAYO LAGUNA GAWRACO
MEEL CID AAN ILAAHAY AHAYN WAQDHAACIN LOOGU LOOGAY
Eebbe kor ahaayee wuxuu yiri:
[Hajoogsan dhexdiisa waligaa, masaajid lagu billaabay maalintii horeba dhowrsasho yaa mudan inaad joogsato dhexdiisa (masaajidka Nabiga iyo Quba) waxaa dhex jooga niman jecel inay is daahiriyaan Eebbana wuu jecelyahay kuwa is daahiriya]At-Tawbah 108.
Waxaana Saabit Bin Daxaag Allaha ka raalli noqdee, laga soo weriyay, in uu yiri:"Nin ayaa yaboohay in uu geel waqdhaacin ah ku bireeyo meel magaalada Mako ku taal oo "Buwaana" Layiraahdo, kolkaas baa Nabigu Naxariisi korkiisa ha haatee, waydiiyay oo yiri: Meesha sanam waagii hore gaaladu caabudi jirtay ma aalli jiray?. Kolkaas baa asaxaabtii ku dheheen: Maya!.
Kolkaas baa Nabigu yiri: Meeshu meel gaaladu ku ciidi jirtay armay tahay?. Asaxaabtii ayaa haddana yiri: Maya. Kolkaas baa Nabigu ninkii ku yiri: Yaboohaaga oofi, maxaa yeelay wax dambi kaaga imaanayo iyo wax aan gacanta aadanaha ku jirin (oo aan aadanuhu heli karin) lama yabooho.
MAS'ALOOYINKA CASHARKA
Tan 1aad: Waa tafsiirka aayadda (kor lagu soo xusay).
Tan 2aad: Waa in laga yaabo in dambiga iyo xasanaadku ay dhulka lagu kor samaynayo saameeyaan.
Tan 3aad: Waa in mas'alooyinka aan caddayn loo celinayo mas'alooyinka kale ee cad si loo ogaado arrinta run-teeda.
Tan 4aad: Waa in ninkii diinta wax laga waydiiyo ay la gudboontahay in uu si faahfaasan u warsado arrinta wax laga waydiiyay haddii uu u baahdo.
Tan 5aad: Waa in aanay wax ku jabnayn in la yabooho in meel gaar ah lagu waqdhaacinto, haddii wax kale oo arrintaa diidaya aanay jirin.
Tan 6aad: Waa in aanay bannaanayn in waqdhaacin lagu baxsho meel sanam yaallo ama uu aalli jiray.
Tan 7aad: Waa in ay reebbantahay in lagu waqdhaacinto meel gaaladu ku durraamato ama ay ku durraaman jirtay.
Tan 8aad: Waa in aanay bannaanayn in la oofiyo waqdhaacinka meelaha jaadkaas ah loo yaboohay, maxaa wacay, oofintiisa dambi ayaa ka imaanaya.
Tan 9aad: In laga digtoonaado in lagu daydo gaalada ciidahooda, kas iyo kama' tii ay danto ha ahaatee.
Tan 10aad: Waa in aan la yaboohi karin wax dambi ka imaanayo.
Tan 11aad: Waa in aan la yaboohi karin aadanuhu wixii uusan awood u lahayn.
(Waa socotaa..)
F.G: Warka ku qoran labada bil (...) inta u dhaxaysa, waa war aan anigu ku deray tarjamada, si aan macnaha u caddeeyo, inta kalena waa warkii qoraaga.
* Dhammaan aayadaha quraanka ah tarjamadooda afsoomaaliga ah waxaan ka soo qaadannay kitaabkii (Quraanka kariimka iyo tarjamada macnihiisa ee afka soomaaliga) ee uu qoray Maxamad maxamud cabdi, waxna kama aanan beddelin tarjamada meelo yaryar oo qaldan baan saxnay meelo uu wadaadku ka boodayna waan ku darnay.
** Haddii ay dhammaato tarjamada kitaabka Tawxiidka ee hadda socota, ee uu qoray Sh. Maxamad Bin Cabdil Wahhaab, oo ah shiikha Wahhaabiyada, Salafiyada iyo Itixaadka Iwm, waxaa ku xigi doona Tarjamadii Kitaabkii "Al-Ibanah Can Usuul Ad-Dayyaanah" ee uu qoray Sheekhii Ashcariyada. Sidaa darteed, dhammaan waxaan ka codsanaynaa aqristayaasha bogga Diinta Islaamka in ay ina soo siiyaan wixii talo iyo tusaale ah inta aanan buuggan hadda socda dhammaan.
BOGGA 6AAD:
BY: Qasim Hersi Farah
CURRENT ENVIRONMENTAL DEGRADATION IN SOMALIA
MARINE POLLUTION
Somalia is blessed with a long resources-rich coastline, extending for about 3,335 km, borders the
Gulf of Aden in the North, Indian Ocean in the East to South and Kenya in the South. It is the
longest and most full of natural resource coastline in Africa.
This coastline is very fresh of use, perhaps deposited to the posterity. But it dares, nowadays, to be
an international garbage can, whereby foreign vessels indiscriminately pollute it sharply without
discrimination. Proportionately, every month tenths of indigenous people die in or around every
seashore area of the country from direct and immediate effects of unknown and unexpected
poisonous substances which is, really, catastrophic blowout. For instance, in Eil-dher, a small town
in Galgadud region, in April 1996, the seashore water put out a blue-black collar effluence which
is oily-liquid with unprecedented proportion. In addition, a large number of sealed strange
containers were seen floating out. The residents haphazardly and curiously tried to investigate it.
consequently, many were killed as they were to open or destroy such containers. Another event
was when the same containers appeared on the Adale seashore in 1992.
The common source of Somalian marine pollution is that caused by external diffuses of pollution
from seabed activities and ocean dumping (land based pollution is also there increasingly) which is
deliberate disposal into Somalian sea water.
(To be continue next week)
BOGGA 7AAD:
SHEEKADII KALIILA IYO DIMNA
Qaybtii: 9aad
Waxaa qoray: C/laahi ibn al-Muqafac
Waxaa soomaaliyeeyay: Hersi M. Labagarre
LIBAAXII IYO DIBIGII
Dimna: Waxaa la yiraahdaa rag waa sadex, feejignaade, kasii feejignaade, iyo taaglaawe, kuwa feejigan kan ugu sii feejigani waa midka haddii talo dhacdo aan argagixin ogaalkiisuna amban, tabtiisa iyo dhagarta uu doonayo in uu taa uga baxana aaneey taag beelin, waxaana kaas ka sii feejigan kan u heeganka ah oo hooggu inta uusan dhicin garanaya, oo intuu aad ugu fiirsaday tab uu uga baxo u dhigtay, sidii nin waligiis u taagnaa oo gees iska mariya inta aan hooggu ku imaan, arrintana inta aaney dhicin ka hor taga.
Taag laawena waa kan labalabeeya oo hanqal taaga oo caga jiida intii uu ka dhinto, taasna waxaa la mid ahaa kalluunyadii saddexda ahaa.
Libaaxii: oo taasi sidee bay ahayd?.
Dimna: waxaa la yiri gal ayaa waxaa ku jiray sadex kalluun, feejignaade, kasii feejignaade iyo taaglaawe, galkaasina wuxuu ku yiil meel dhulka ka sareyda oo aan cidna u soo dhawaan karin, wax aana u dhawaa wabi daadaya, waxaase dhacday in laba ugaarsade ay soo gudbeen wabigii, oo dabadeed galkii arkeen, oo ku balla meen in ay shabaqyadooda soo qaataan, oo kalluunka halkaa ku jira ka ugaarsadaan.
Kalluunyadiina hadalkoodii way maqleen, kii u feejignaa markii uu hadalkoodii maqlay baa dhiillo gashay oo wuu cabsaday wax kalena kuma leexan, ee gacankii biyaha wabiga ka keenayay ayuu ka baxay, kii feejignaa-na meeshiisii buu ku nagaaday, intii ay labada ugaarsade ka imaanayeen, kolkii uu arkay, oo uu ogaaday waxa ay u dan leeyihiin buu orday si uu uga baxo gacanka biyuhu ka soo gelayeen, markii uu tegayna wuuba xirnaa, markaas buu yiri: waan gafay tanina waa mirihii gafkayga, hase ahaatee maxaa tab ah, inkasta oo tab keda kedo iyo daal badanaa wax terin, waxgaradkuse talo wax dheef leh kama quusto, sina ugama haro, talada iyo dadaalkana kama tago.
Markaa kadib buu wax dhintay iska dhigay, oo biyaha dushoo da soo foocay, asiga oo marna dhabarkiisa kormarinaya marna calooshiisa kormarinaya, markaas baa ugaarsatadii qabatay oo meel wabiga iyo galka u dhexaysay dhigeen, markaas buu booday oo wabiga biyihiisii ku dhacay, sidaa ayuuna ku fakaday.
Taaglaawihiina intii uu horay iyo gadaal u meeraysanayay baa la ugaarsaday.
libaax: taas waan gartay, una malayn maayo in dibigu i dhagrayo, jabna ila dooni maayo, sidee buu taas u samaynayaa asiga oo aan waligiis xumaato igu arag, wax dheef oo dhanna aan u sameeyay, wixii uu doonayana aan u qabtay.
Dimna: uur xumaalowgu wax buu taraa oo kaalintiisa wuu ka soo dhalaalaa, intii laga gaarsiinayo jago uusan mudnayn, markii uu gaarana wuxuu u hanqal taagaa meel ka sii saraysa, gaar ahaan hagarrowga iyo abaal laawaha.
(Waa socotaa...)
BOGGA 8AAD:
[MACMACAANKA MURTIDA SOOMAALIYEED]
Waxaa Qoray: Hersi M. Labagarre
[Macalinow,(kalcurjuuni) tii ka dambaysay hilibka ka maqanaa!!]
wadaad iyo ardaygiisii baa is raacay oo reer bay u hoydeen,reerkuna allabari bay qabeen, hilibkii kolkii uu bislaaday bay wadaadkii iyo ardaygiisii hilib u keeneen, hilibkana cadiin laguma soo derin, ardaygii markii uu arkay in hilibka caddiintii ka maqantahay, buu doonay in uu si sarbeeb ah macalinka taas u ogaysiiyo, kolkaas buu yiri: macalinow kalcurjuuni tii ka dambaysay hilibka ka maqanaa?.
Macalinkii: Maandhow waan u jeedaa "kiraaman" tiika dambaysay geelooda allaha ku ridee.
kalcurjuuni tii ka dambaysay, wuxuu uga jeedaa (alqadiimi)sida quraanku sheegay, alcaddiimi buuna uga danleeyahay.
kiraaman tii ka dambaysayna wuxuu uga jeedaa, "bararatin", sida quraanka ku taalla, barar geelooda allaha ku rido buuna uga danleeyahay.
BOGGA 9AAD:
Dhammaan dhallinyarada soomaaliyeed meel ay joogaanba waxaan ogaysiinaynaa in wargayska Codka Soomaalida Cusubi ku soo dhawaynayo gacmo iyo laab furan wixii talo ah ama qoraal ah ee ay doonayaan in ay ku fidshaan wargayskan, ha usoo direen:
hersi@brunet.bn
******
Wargayskan bilaash (Free) baa lagu qaybshaa, cid aan soo codsanna looma diro. Hadaba, qofkii doonaya in loo soo diro email ha soo diro asiga oo leh:
(ii soo dir codka soomaalida cusub)
, ama ha saxiixo, buugga martida ee ku yaalla halkan:
http://cschpage.cjb.net
qofkii aan doonayn in loo soo dirana, ha soo qoro email
asiga oo leh
(ha ii soo dirin codka somalida cusub).
"DHAMMAAN MAQAALADAHA WARGAYSKAN KU SOO BAXA WAXAY
U TAAGANYIHIIN ARAGTIDA QORAAGA EE UMA TAAGNA
UJEEDDADA WARGAYSKA"
