---

An Sabi ni Levy ...

"Arong sa angog may katungod"                              Levy S. Aureus, BIKOL DAILY

An arong iyo an burikbutik na dukot sa kublit, color itom, may veces brown, na an appearance flat kong bakong uldot na tinubuan nin buhok.

Dae nin cientificong consequencia an arong alagad igwa nin suanoy na pagtubod sa saiya nababasa an satuyang naturaleza.

An arong ngani sa ngabil senal na matabil. Kadakli sa tsismis mahilig;an gustong trabajo announcer sa radyo; an iba nabagsak dispatcher sa terminal nin auto.

An arong sa yukyok dapuan nin angsod mantang an yaon sa laog kan pusod nagkakarigos san ga-not.

An arong sa angog seguradong igwa nin katungod sa ibabang angog. An tawong harani sa Dios masakit maheling an angog sa tuhod ta ferming nakaluhod.

An arong sa nguso makimaluto; kun sa muro, an boot sabihon mahiro. Kon bakong pickpocket, sugapa sa "tong-it".

An lalaking nagbibilang nin agom dai niamo aram kon yaon sain an arong. An babaeng paralakawon asahan na may arong sa daphan.

An tawong hugakon asahan na an likod tadtad nin arong na maiton. Kun igwa sa pisngi, kun haen an luha nag-aagi, nagbibilang na ngona nin taon bago magkaigwa nin agom ta probadong baralohon.

An tawong igwa nin kublit na color talong, dae na maheling an arong sa sobrang itom. An lalaking may arong sa payo, senal na madunong, dae nadadakop kan agom maski nagtuturog sa ibang harong.

Sa gabos na arong, an yaon sa si-ngit iyo an may hinanakit ta alangan sa langit, firme pang mapa-sit.

Hinuhumbalan, sinisikadan pero dae matumang. Kaya palan ta tadtad nin arong an daghan.

An burikbutik na puti sa laog kan mata olay mo arong sa biglang pagheling. Idto palan, muting.

Halawig an buhay nin tawo kun an duwang talinga dakula na, may arong pa.

An sakuyang Lolo Carpo nagadan, an edad ciento cuarenta. Alagad dae nin arong sa talinga, ta dae man nin talinga.

---