Adiós, patria idolatrada, país del sol querido,

Perla del playa del Oriente, perdido Edén;

Yo ta dale a ti mi vida, tristi, dolorido;

Si sana más brillante, más fresco y divertido

También todo esto yo di dale para tu bien.

Na campo di batalla luchando cun delirio,

Muchu ya dale el vida sin duda, sin pesar;

No vale nada el sitio: ciprés, laurel o lirio,

Entablau o campo abierto, combate o cruel martirio,

Todo igual para quien ta amá su Patria y su hogar.

Yo di murí al ver el claridad despertadora

Qui el sol ta traí después de tanto oscuridad;

Si tu quiere grana para teñí tu aurora,

Taquí mi sangre, derrama tú na justu hora

Cun oro del luz naciente y su suave intensidad.

El sueño mio cuando yo pa muchacho inocente,

Y aquel cuando yo pa joven lleno di vigor,

Todo para mirá un día, perla del Oriente,

Seco tu ojos negro, alto tu limpio prente,

Sin raya, sin arruga, sin rastro di dolor.

Ensueño de mi vida, esperanza y consuelo,

'¡Salud!' ta gritá mi alma qui tan pronto dí salí.

'¡Salud!' Qué bunito caí para subí tu vuelo,

Murí para lugrá tu vida, bajo tu cielo

Murí, y aquí na tu tierra para siempre dulmí.

Si tú un día di mirá crisí na mi sepultura

Entre el grueso yerba, un flores llano y sin olor,

Atraca tú y dale un beso a mi alma pura; na tumba frío di sintí mi prente el prescura

Di tu cariño y, di tu resuello, el calor.

Dijá qui el luna dale su luz suave y bunito,

Dijá qui el día traí su color brillante y audaz,

Dijá qui el viento quijá con su jumbada o grito;

Y si na mi cruz bajá y pará un pajarito,

Dijá que el pajarito cantá su canto di paz.

Dijá que el vapor subí por el calor ardiente,

Y na cielo quidá puro cun mi suspiro en pos;

Dijá qui un buen amigo llurá mi fin doliente;

Y si di noche ta rizá por mí algún gente,

Rizá también, Patria mía, para mi descanso a Dios.

Rizá para el muerto sin suerte, viejo o criatura,

Para todo qui ya sufrí tormento sin igual,

Para nisós nana qui ta quijá su amargura,

Rizá para huérfano, viuda, preso en tortura,

Y para ti, para lligá tu redención final.

Y cuando el noche oscuro ta cubrí el cementerio,

Y solo maná muerto qui ta hasí bantay allí,

No disturbá su descanso, ni su misterio;

Y en caso tu di uí son di lira o salterio,

Yo aquel, querida Patria, yo qui ta cantá a ti.

Cuando mi tumba ya quidá ya dejao en banda

Y nuay más cruz ni piedra para marcá su lugar,

Dijá qui ará el hombre y miñá cun azada

Mi mga ciniza antes qui todo quidá nuay nada

Y el polvos silví como alpombra de tu hogar.

Si no vale nada más cunmigo el tu olvido;

Yo di cruzá tu aire, y tu campo yo puede vé

Fino y limpio, yo di quidá un nota na tu oído;

Perfume, luz, mga color, rumor, canto, gimido

Amada Patria, dolor sin igual, sin amparo,

Uí, Filipinas, mi último adiós;

Tú ya cuidao cun mi tata y todo quien yo caro,

Yo di andá donde nuay más esclavo, nuay bárbaro,

Donde el fe no ta matá, y donde sólo rey el Dios.

Adiós, tata y nana, y mga hermano del alma mía

Maná amigo de mi niñez, del tiempo qui pasá;

Dale gracias por mi descanso del fatigoso día;

Adiós, mi dulci estranjera, amiga y alegría;

Adiós a todo. Yo di murí para discansá.