首先本人真係好鬼死高興俾大家「推舉」為新一屆 「TUEN YUEN」 嘅主席，得到咁多位老友嘅支持，我有咩辦法唔高興先得。雖然我咁「膠興」但係我都會盡力為會謀福利為國家謀福祉嘅。

本會自二零零二年十月成立已經幾日啦，本會之所以能夠成立，可以話係一次巧合，但係都可以話係一個宿命﹕

點解係巧合呢？記得係幾日前一次朋友聚會裡面，原本大家唸住打完籃球一齊食餐飯，食完飯咪鬆人囉，點知唔知邊個口痕友話﹕「今次只不過係第一次，我哋攪嘅節目會陸續有嚟！」﹔又有唔知邊條臭四話﹕「不如攪個會等大家可以定時定候聚聚啦！」

就係咁樣樣嘅口痕友同埋臭四嘅口沬，成為本會巧合地成立嘅初形；咁究境點解又會話我哋會嘅成立係一個宿命呢？

原因好簡單，因為我地已經係一班相識已久嘅朋友，出嚟聚會、玩就梗啦！ 而攪個 FAN 屎 CLUB 出嚟都只不過係想攞個名份或者係遲早嘅事嚟啫，而且會嘅成立又可以令大家嘅距離又一次拉近，睇真啲又好似百利而無一害。正因為咁，冥冥中好似自有主宰咁成立第一屆攪嘢會，而宿命就之唔係「走唔甩」嘅意思囖。

我現在再一次鄭重宣佈﹕
本會正式成立，並且我哋係認真嘅。

最後我希望並且祝願我哋嘅幹事、會員同埋親朋家眷都會好似以下歌詞一樣，抱有同樣嘅信念———

「總相信八十歲後 仍然能分享【好戲】」

主席
健威
二零零二年十月十五日