Yer bout crime
Deh daaz
When you could left yo clothes
All night pan line.
Bway ah no di tell no lie
Deh daaz everybody use to try
Yo see young bway the hustle pint
Or the sell pie
With one dalla
All kinda things yo coulda buy.
Deh daaz when girlz use to wear dress.
Boyz G down ina long pants
Well creased and neatly press.
Deh daaz black pipple use to help one anatha
When badman like Amin
Had respect fi Tablada
When we use to live pan Creole bread
Ahn soso sugah wata.
Deh daaz we had respect
Fi di ole one
When we use to eat Goatshit,
Cutta brute and Kahsham.
Deh daaz
When Belize
Dah mi ya district ah Chicago Cubs
When young bway do anything
Fi own wah big Dubs.
Deh daaz
When break dance
Mi di lick
Matinee dah mi di Flick
Or when pickney just fi di kick
Tease Chicky Chick with ih bamboo stick.
Deh daaz
When yo had to go dah Sunday School
When yo si pickney the tease Ramsey
Ahn ih mule
Deh daaz
When man had respek,
Fi gal
Deh daaz Parks deh dah every funeral
Parks had respek fi di dead
Deh daaz yo geh kicks
When yo tease Bagga-Head.
Deh daaz
Yo si pickney di fly kite
Ahn play gamma
Or the play house
When all weh deh bway wah be dah Papa.
Deh daaz
Pipple use to Dance to Laad Laro
Had nuff love fi Calypso
Deh daaz pipple use to love chi-cha-roung or pan-a-daro
Deh daaz
When yo neva no bout peanuts butta,
And Cheez wiz
Yo use to save yo one cents
Fi buy haadtime and smarties.
Deh daaz
When pickney use to smell a piss
Deh daaz
When yo use to wear peg tennis
Deh daaz
Pickney had mannasz
Yo address adults
With Mr. or Ms.
Yo couldn't cuss badword
Or else yo get yo mouth twist
So bway
Open Yo eaaz
And listen to this
You don't no weh you the miss.
So Bway! Come ova ya
Put down the knife
And the Gun
Come, Come,
Come and listen!
To words of Wisdom
Sit down ahn open yo eaaz
Cause it all started
Back inah di daaz.