Grunnen Webziede

Tweederdeweg

Mit die zel ik
over dizze poaden goan:
Machtege locht boven uns
woar wolken laangzoam vechten as
logge, olde reuzen.
Zun fel en loag in t Westen

Zet de plazzen in braand.
Van t natregende veld zweft r n
dunne, welkome geur omhoog: Veurjoar.

Ondergoande zun fel en glaanzend as glas.

De eeuwege wind wordt kolder
dreugt mien brouk en regenjas.
In t Westen is de locht n zacht, licht jewail
boven de Pageflats. In t Noorden Nije Pekel
de rode meuln, boerderaien en bomenschaduw.

De schietboan: Vörmen duuster en voag
in scheemring, deur de wind mitgebloazen
over t laand. Drai ainzoame bomen, muide
schildwachters, woakend over de weg.

Dizze akkers, dizze sloten
kiekten over mien scholder mit
dou tied mie vörmd het. Loop hier mit mie,
vraauw van n ver veld. Dit ainzoame land,
dizze zachte avond, olde zun en regen
hemmen die wat te vertellen.