حاتجن ...!
حاتجن يا ريت ياخوانا مارحتش لندن و لا باريز
دي بلاد تمدين و نضافه و ذوق و لطافه و حاجه تغيظ
مالقيتش جدع متعافي ، و حافي ، و ماشي يقشر خص
و لا شحط مشمرخ افندي معاه عود خلفه و نازل مص
و لا لب اسمر و سوداني و حمص و انزل ياتقزقيز
حاتجن ياريت ياخوانا مارحتش لندن و لا باريز
و لا عركه ف نص الليل دايره بالحيل و ساحبها بوليس
قدامها جدع متجرجر وشه معور قال ده عريس
الخلق ما هي بتتجوز و اشمعنى احنا ما فيش تمييز
حاتجن ياريت ياخوانا مارحتش لندن و لا باريز
و لا واحده ف وش الفجر تبرطع ماليه الدنيا صوات
قال إيه جوز خالتي ام احمد سلفة اخوها السيد مات
سبحانك ما اعظم شأنك و الله الموت دا مفيد و لذيذ
حاتجن ياريت ياخوانا مارحتش لندن و لا باريز
و لا واحد طالع يجري و واحد تاني بيجري وراه
و يقول ها هع حصلتك يابن اللي ابصر إيه عاملاه
لا الشارع غيط ياخوانا و لا احنا بداره و لا احنا معيز
حاتجن ياريت ياخوانا مارحتش لندن و لا باريز
و لا واحد بيبيع حاجه يقول بريال و تاخدها بصاغ
ياخوانا دي حتى الإبره تاخدها بدوشة و قلب دماغ
حلفان و عراك و مناهدة و يمكن ضرب كفوف يا حفيظ
حاتجن ياريت ياخوانا مارحتش لندن و لا باريز
و لا فيش ميت ألف صعيدي بتوع يانصيب هاجمين و لا فيش
ميت ألف معوض داعس جاي معاه صندوق ورنيش
و الله كرهت القهوه و حرمت أقعد ع الأفاريز
حاتجن ياريت ياخوانا مارحتش لندن و لا باريز