The Auld Hoose
Lady Nairne
Oh! the auld hoose, the auld hoose,
What though the rooms were wee,
Oh, kind hearts were dwelling there,
And bairnies fu’ o’ glee;
The wild rose and the jesasmine
Still hang upon the wa’,
Hoo mony cherish’d memories
Do they sweet flow’rs reca’.
Oh! The auld laird, the auld laird,
Sae canty, kind, and crouse,
Hoo mony did he welcome to
His ain wee dear auld hoose.
And the leddy too, sae genty,
There sheltered Scotland’s heir,
And clipt a lock wit’ her ain han’
Frae his lang yellow hair.
The mavis still doth sweetly sing,
The blue-bells sweetly blaw,
The bonnie Earn’s clear winding still
But the auld hoose is awa’.
The auld hoose, the auld hoose,
Deserted though ye be,
There ne’er can be a new hoose
Will seem sae fair to me.
Still flourishing the auld pear tree
The bairnies liked to see,
And oh, hoo aften did they speer
When ripe they a’ wad be.
The voices sweet, the wee bit feet
Aye running here and there,
The merry shout – oh, whiles we greet
To think we’ll hear nae mair.
For they are a’ wide scattered noo,
Some to the Indies gane,
And ane alas! to her lang hame-
Not here we’ll meet again.
The kirkyard, the kirkyard!
Wi’ flow’rs o’ ev’ry hue,
Is shelter’d by the holly’s shade
An’ the dark sombre yew.
The setting sun, the setting sun!
Hoo glorious it gaed down;
The cloudy splendour rais’d oor hearts
To cloudless skies aboon,
The auld dial, the auld dial,
It taud hoo time did pass;
The wintry winds ha’e dang it down
Noo hid ‘mang weeds and grass.
Scots Dictionary
Scottish Waltz Medleys 1
Let's Sing!
(Index of Scots Songs)
Let's Dance!
(Index of Scottish Dance Music)
Our Main Site
