faasale aise bhii ho.nge ye kabhii sochaa na thaa 
saamane baiThaa thaa mere aur vo meraa na thaa 

vo ki Khushbuu kii tarah phailaa thaa mere chaar suu 
mai.n use mahasuus kar sakataa thaa chhuu sakataa na thaa 

raat bhar us kii hii aahaT kaan me.n aatii rahii 
jhaa.Nk kar dekhaa galii me.n ko_ii bhii aayaa na thaa

aks to maujuud the par aks tanahaa_ii ke the 
aa_iinaa to thaa magar us me.n teraa cheharaa na thaa 

aaj us ne dard bhii apane alahadaa kar diye 
aaj mai.n royaa to mere saath vo royaa na thaa 

ye sabhii viiraaniyaa.N us ke judaa hone se thii.n 
aa.Nkh dhu.Ndhalaa_ii hu_ii thii sahar dhu.Ndhalaayaa na thaa 

yaad karake aur bhii takaliif hotii thii "Adeem" 
bhuul jaane ke sivaa ab ko_ii bhii chaaraa na thaa 
		 

 
kaT hii ga_ii judaa_ii bhii, kab yuu.N huaa ke mar gaye 
tere bhii din guzar gaye, mere bhii din guzar gaye

tuu bhii kuchh aur aur hai, ham bhii kuchh aur aur hai.n 
jaane vo tuu kidhar gayaa, jaane vo ham kidhar gaye

raaho.n me.n hii mile the ham, raahe.n nasiib ban ga_ii.n 
tuu bhii na apane ghar gayaa, ham bhii na apane ghar gaye

vo bhii Gubaar-e-Khaak thaa, ham bhii Gubaar-e-Khaak the 
vo bhii kahii.n bikhar gayaa, ham bhii kahii.n bikhar gaye

ko_ii kinaar-e-aab-e-juu, baiThaa huaa hai sar_niguu.N 
kashti kidhar chalii ga_ii, jaane kidhar bha.Nvar gaye

tere liye chale the ham, tere liye Thahar gaye 
tuu ne kahaa to jii uThe, tuu ne kahaa to mar gaye

vaqt hii kuchh judaa_ii kaa, itanaa taviil ho gayaa 
dil me.n tere firaaq ke, jitane the zaKhm bhar gaye

itane qariib ho gaye itane raqiib ho gaye 
vo bhii "Adeem" Dar gayaa ham bhii "Adeem" Dar gaye