bhii.D me.n ik ajanabii kaa saamanaa achchhaa lagaa 
sab se chup kar vo kisii kaa dekhanaa achchhaa lagaa 

suramaii aa.Nkho.n ke niiche phuul se khilane lage 
kahate kahate kuchh kisii kaa sochanaa achchhaa lagaa 

baat to kuch bhii nahii.n thii lekin usakaa ek dam 
haath ko ho.nTho.n pe rakh kar rokanaa achchhaa lagaa 

dil me.n kitane ahad baa.Ndhe the bhulaane ke use 
vo milaa to sab iraade to.Danaa achchhaa lagaa 

beiraadaa lams kii vo sanasanii pyaarii lagii 
kam tavajjo aa.Nkh kaa vo dekhanaa achchhaa lagaa 

us uduu-e-jaa.N ko "Amjad" mai.n buraa kaise kahuu.N 
jab bhii aayaa saamane vo bevafaa achchhaa lagaa 
		 

 
chaa.Nd ke saath kaii dard puraane nikale 
kitane Gam the jo tere Gam ke bahaane nikale 

fasl-e gul aaii phir ik baar asiiraan-e-vafaa 
apane hii Khuun ke dariyaa me.n nahaane nikale 

hijr ki choT ajab sa.ng-shikan hotii hai 
dil kii befaiz zamiino.n se Khazaane nikale 

umr guzarii hai shab-e-taar me.n aa.Nkhe.n malate 
kis ufaq se meraa Khurshiid na jaane nikale 

dil ne ik iiTh se taamiir kiyaa taaj-mahal 
tuu ne ik baat kahii laakh fasaane nikale 

dasht-e tanahaaii-e-hijraa.N me.n kha.Daa sochataa huu.N 
haaye kyaa log meraa saath nibhaane nikale 

mai.n ne "Amjad" use bevaastaa dekhaa hii nahii.n 
vo to Khushbuu me.n bhii aahaT ke bahaane nikale 
		 

 
dil ke dariyaa ko kisii roz utar jaanaa hai 
itanaa besimt na chal laut ke ghar jaanaa hai 

us tak aatii hai to har chiiz Thahar jaatii hai 
jaise paanaa hii use asl me.n mar jaanaa hai 

bol ai shaam-e-safar ra.ng-e-rihaaii kyaa hai 
dil ko rukanaa hai ki taaro.n me.n Thahar jaanaa hai 

kaun ubharate hue mahataab kaa rastaa roke 
usako har taur suu-e-dasht-e-sahar jaanaa hai 

mai.n khilaa huu.N to isii Khaak me.n milanaa hai mujhe 
vo to Khushbuu hai use agale nagar jaanaa hai 

vo tere husn kaa jaaduu ho ke meraa Gam-e-dil 
har musaafir ko isii ghaaT utar jaanaa hai 

		 

 
kahaa.N aake rukane the raaste, kahaa.N mo.D thaa use bhuul jaa 
vo jo mil gayaa use yaad rakh, jo nahii.n milaa use bhuul jaa 

vo tere nasiib kii baariishe.n, kisii aur chhat pe baras ga_ii 
dil-e-beKhabar merii baat sun, use bhuul jaa use bhuul jaa 

mai.n to gum thaa tere hii dhyaan me.n, terii aas me.n tere gumaan me.n 
havaa kah ga_ii mere kaan me.n, mere saath aa use bhuul jaa 

tujhe chaa.Nd ban ke milaa thaa jo, tere saahilo.n pe khilaa thaa jo 
vo thaa ek dariyaa visaal kaa, so utar gayaa use bhuul jaa 
		 

 
na shikaayate.n na gilaa kare 
ko_ii aisaa shaKhs huaa kare 
jo mere liye hii sajaa kare 
mujh hii se baate.n kiyaa kare 
[gilaa = complaint] 

kabhii roye jaaye vo bepanaah 
kabhii betahaashaa udaas ho 
kabhii chupake chupake dabe qadam 
mere piichhe aa kar ha.Nsaa kare 
[bepanaah = limitless] 

merii qurbate.n merii chaahate.n 
ko_ii yaad kare qadam qadam 
mai.n taviil safar me.n huu.N agar 
merii vaapasii kii duaa kare 
[qurbat = nearness/intimacy; taviil = long; vaapasii = return] 
		 

 
jo utar ke ziinaa-e-shaam se, terii chashm-e-Khush me.n samaa ga_e 
vahii jalate bujhate se mahar-o-maah mere baam-o-dar ko sajaa ga_e 
[ziinaa- ladder;chashm-e-Khush-happy eyes; mahar-o-maah=chaand sitare ]


ye ajiib khel hai ishq kaa, mai.n ne aap dekhaa ye mojezaa 
vo jo lafz mere gumaan me.n the, vo terii zubaa.N par aa ga_e 
[mojezaa- magic]

vo jo giit tumane sunaa nahii.n, merii umr bhar kaa riyaaz thaa 
mere dard kii thii daastaa.N, jise tum ha.Nsii me.n u.Daa ga_e 

vo charaaG-e-jaa.N kabhii jisa kii lau, na kisii havaa se niguu.N hu_ii 
terii bevafaa_ii ke vaasavaa use chupake chupake bujhaa ga_e 
[niguu.N-jhuki]

vo thaa chaa.Nd shaam-e-visaal kaa, ke thaa ruup tere jamaal kaa 
meri ruuh se merii aa.Nkh tak kisii raushnii me.n nahaa ga_e 

ye jo ba.ndagaan-e-niyaaz hai, ye tamaam hai vo lashakarii 
ji.nhe.n zi.ndagii ne aman na dii, to tere huzuur me.n aa ga_e 

terii beruKhii ke dayaar me.n, mai.n havaa ke saath havaa huaa 
tere aa_iine kii talaash me.n, mere Khvaab cheharaa ga.Nvaa ga_e 

tere vaasavaao.n ke fishar me.n, teraa sharar-e-ra.ng uja.D gayaa 
merii Khvaahisho.n ke Gubaar me.n, mere maah-o-saal-e-vafaa ga_e 

vo ajiib phuul se lafz the, tere ho.nTh jinase mahak uThe 
mere dasht-e-Khvaab me.n duur tak, ko_ii baaG jaise lagaa ga_e 

merii umr se na simaT sake, mere dil me.n itane savaal the 
tere paas jitane javaab they, terii ik nigaah me.n aa ga_e