kabhii yuu.N bhii aa merii aa.Nkh me.n ke merii nazar ko Khabar na ho 
mujhe ek raat navaaz de magar uske baad sahar na ho

vo ba.Daa rahiim-o-kariim hai mujhe ye sifat bhii ataa kare 
tujhe bhuulane kii duaa karuu.N to duaa me.n merii asar na ho 

mere baazuo.n me.n thakii thakii , abhii mahav-e-Khvaab hai chaa.Ndanii 
na uThe sitaaro.n kii paalakii, abhii aahaTo.n kaa guzar na ho 
[mahav-e-Khvaab - khwab mein dubi]

ye Gazal ki jaise hiran kii aa.Nkho.n me.n pichhalii raat kii chaa.Ndanii 
na bujhe Kharaabe kii roshanii, kabhii becharaaG ye ghar na ho

vo firaaq ho yaa visaal ho, terii yaad mahakegii ek din 
vo gulaab ban ke khilegaa kyaa, jo chiraaG ban ke jalaa na ho 

kabhii dhuup de, kabhii badaliyaa.N, dil-o-jaa.N se dono.n qubuul hai.n 
magar us nagar me.n na qaid kar jahaa.N zi.ndagii kii havaa na ho 

kabhii din kii dhuup me.n jhuum ke kabhii shab ke phuul ko chuum ke 
yuu.N hii saath saath chale.n sadaa kabhii Khatm apanaa safar na ho 

mere paas mere habiib aa zaraa aur dil ke qariib aa 
tujhe dha.Dakano.n me.n basaa luu.N mai.n ke bichha.Dane kaa kabhii Dar na ho 
		 

 
Khushbuu kii tarah aayaa vo tez havaao.n me.n 
maa.Ngaa thaa jise ham ne din raat duaao.n me.n 

tum chhat par nahii.n aaye mai.n ghar se nahii.n nikalaa 
ye chaa.Nd bahut laTakaa saavan ki ghaTaao.n me.n 

is shahar me.n ik la.Dakii bilkul hai Gazal jaisii 
phuulo.n kii badan vaalii Khushbuu sii adaao.n me.n 

duniyaa kii tarah vo bhii ha.Nsate hai.n muhabbat par 
Duube huye rahate the jo log vafaao.n me.n 

		 

 
kabhii to aasmaa.N se chaa.nd utare jaam ho jaaye 
tumhaare naam kii ik Khuubasuurat shaam ho jaaye 

ajab haalaat the yuu.N dil kaa saudaa ho gayaa aakhir 
mohabaat kii havelii jis tarah niilaam ho jaaye 

mai.n Khud bhii ehatiyaatan us galii se kam guzarataa huu.N, 
ko_ii maasuum kyo.n mere liye badanaam ho jaaye 

mujhe maaluum hai us kaa Thikaana phir kahaa.N hogaa 
pari.ndaa aasmaa.N chhuune me.n jab naaqaam ho jaaye 

ujaale apanii yaado.n ke hamaare saath rahane do 
na jaane kis galii me.n zi.ndagii kii shaam ho jaaye 
		 

 
mere saath tum bhii duaa karo yuu.N kisii ke haq me.n buraa na ho 
kahii.n aur ho na ye haadasaa ko_ii raaste me.n judaa na ho

merii chhat se raat kii subah tak ko_ii aa.Nsuuo.n kii lakiir hai 
zaraa ba.D ke chaa.Nd se puuchhanaa vo isii taraf se gayaa na ho 

sar-e-shaam Thaharii hu_ii zamii.n, aasamaa.N hai jhukaa huaa 
isii mo.D par mere vaaste vo charaaG le kar kha.Daa na ho 

vo farishte aap hii Dhuu.NDhiye kahaaniyo.n kii kitaab me.n 
jo buraa kahe.n na buraa sune ko_ii shaKhs un se Khafaa na ho 

vo visaal ho ke firaaq ho terii aag mahakegii ek din 
vo gulaab ban ke khilegaa kyaa jo charaaG ban ke jalaa na ho 

mujhe yuu.N lagaa ki Khaamosh Khushbuu ke ho.NTh titalii ne chhuu liye 
i.nhii.n zard patto.n kii oT me.n ko_ii phuul soyaa huaa na ho 

isii ehatiyaat me.n mai.n rahaa, isii ehatiyaat me.n vo rahaa 
vo kahaa.N kahaa.N mere saath hai kisii aur ko ye pataa na ho 
		 

 
na jii bhar ke dekhaa na kuchh baat kii 
ba.Dii aarazuu thii mulaaqaat kii 

ka_ii saal se kuchh Khabar hii nahii.n 
kahaa.N din guzaaraa kahaa.N raat kii 

ujaalo.n kii pariyaa.N nahaane lagii.n 
nadii gunagunaa_ii Khayaalaat kii 

mai.n chup thaa to chalatii havaa ruk ga_ii 
zubaa.N sab samajhate hai.n jazbaat kii 

sitaaro.n ko shaayad Kahbar hii nahii.n 
musaafir ne jaane kahaa.N raat kii 

muqaddar mere chashm-e-pura'ab kaa 
barasatii hu_ii raat barasaat kii