phir usii raahaguzar par shaayad 
ham kabhii mil sake.n magar shaayad 

jaan pahachaan se kyaa hogaa 
phir bhi ai dost Gaur kar shaayad 

mu.ntazir jinake ham rahe unko
mil gaye aur hama-safar shaayad 

jo bhii bichha.De hai.n kab mile hai.n 'Faraz' 
phir bhii tuu i.ntazaar kar shaayad 
		 

 
sholaa thaa jal-bujhaa huu.N havaaye.n mujhe na do 
mai.n kab kaa jaa chukaa huu.N sadaaye.n mujhe na do 

jo zahar pii chukaa huu.N tumhii.n ne mujhe diyaa 
ab tum to zi.ndagii kii duaaye.n mujhe na do 

aisaa kahii.n na ho ke palaTakar na aa sakuu.N 
har baar duur jaa ke sadaaye.n mujhe na do 

kab mujhako aiteraaf-e-muhabbat na thaa "Faraaz" 
kab mai.n ne ye kahaa thaa sazaaye.n mujhe na do 
		 

 
khaatin hai rah-guzr, thori dooR sath chalo 
bohut kada hai safr thori dooR sath chalo 

tamaam umr kahaan koi sath dai-ta hai 
yeh janta hooN magar thori dooR sath chalo 

Nashe mein choor hooN mai bhi tumhein bhi hosh nahin 
baRRa maza ho agar thori dooR sath chalo 

yeh aik shub ki mulaqaat bhi ghaNimat hai 
kise hai kal ki khabr thori dooR sath chalo 

abhi to jaag rahae hein chiragh rahooN ke 
abhi hai dooR sahr thori dooR sath chalo 

tawaf-e-manzil-janah hamein bhi karna hai 
Faraz tum bhi agar thori dooR sath chalo 
		 

 
tum bhi khafa ho loog bhi burhum hein dosto 
ab ho chala yaqin keh bouray hum hein dosto 

kis ko hamare hal se nisbut hai kya karein 
aankhein to dushmanooN ki bhi purnum hein dosto 

apne siwa humaray na hoonay ka ghum kise 
apni talaash mein to humein hum hein dosto 

kuch aaj shaam hi se hai dil bhi bujha bujha 
kuch shahr ke chiragh bhi mudhum hein dosto 

iss shahr-e aarjo se bhi baahar nikal chalo 
ab dil ki raunaqein bhi koi dum hein dosto 

sub kuch sahi Faraz per itna zaroor hai 
dunya mein aise loog bauhut kum hein dosto 
		 

 
juz teray koi bhi din raat na janay meray  
tu kahaN hai magr Ah dost puranay meray 

shumA ki lau thi kay wo tu tha sab-e-hijr  
daer tak rotA raha koi sirhanay meray 

khalq ki beKhabaree hai keH meree ruswa'ee 
looq mujh ko hi sunatay hein fusanay meray 

Aaj ik aur burS beeth gya us kay beghair  
jis kay hotay hooay hotay thay zamanay meray  

kaash tu bhi meri awaaz sunta ho 
phir pukara hai tujhe dil ki saada ne mere 

kaash tu bhi kabhi aajaye masiha'ee ko 
loog aate hein bohat dil ko dukhane mere 
		 

 
dost ban kar bhii nahii.n saath nibhaanevaalaa 
vahii a.ndaaz hai zaalim kaa zamaanevaalaa 

ab ise log samajhate hai.n giraftaar meraa 
saKht nadiim hai mujhe daam me.n laanevaalaa 

kyaa kahe.n kitane maraasim the hamaare is se 
vo jo ik shaKhs hai muu.Nh pher ke jaanevaalaa 

tere hote hue aa jaatii thii saarii duniyaa 
aaj tanhaa huu.N to koii nahii.n aanevaalaa 

mu.ntazir kisakaa huu.N TuuTii huii dahaliiz pe mai.n 
kaun aayegaa yahaa.N kaun hai aanevaalaa 

mai.n ne dekhaa hai bahaaro.n me.n chaman ko jalate 
hai koii Khvaab kii taabiir bataanevaalaa 

kyaa Khabar thii jo merii jaan me.n ghulaa hai itanaa 
hai vahii mujh ko sar-e-daar bhii laane vaalaa 

tum taqalluf ko bhii iKhalaas samajhate ho 'Faraz' 
dost hotaa nahii.n har haath milaanevaalaa 
		 

 
us ne kahaa sun, ahad nibhaane kii Khaatir mat aanaa 
ahad nibhaanevaale aksar majabuurii yaa 
mahajuurii kii thakan se lauTaa karate hai.n 
tum jaao aur dariyaa dariyaa pyas bujhaao 
jin aa.Nkho.n me.n Duubo jis dil me.n bhii utaro 
merii talab aavaaz na degii 
lekin jab merii chaahat aur merii Khvaahish kii lau 
itanii tez aur itanii uu.Nchii ho jaa_e 
jab dil ro de tab lauT aanaa 
		 

 
Aankh se door na ho, dil se utar jaayega 
Waqt ka kya hai, guzarta hai guzar jaayega 

Itna manoos na ho, khilwat-e-gham se apni 
Tu kabhi khud ko bhi dekhega to darr jaayega 
[manoos=intimate; Khilwat-e-Gham=sorrow of loneliness] 

Tum sar-e-rah-e-wafa dekhte reh jaaoge 
Aur wo baam-e-rafaakat se utar jaayega 
[sar-e-rah-e-wafa=path of love; baam-e-rafaakat=responsibility towards love] 

Zindagi teri ataa hai to ye jaane waalay 
Teri bakhshish teri dehleez pe dhar jaayega 
[ataa=gift; bakhshish=donation; dehleez=doorstep] 

Zabt laazim hai magar dukh hai qayaamat ka "Faraz" 
Zaalim ab ki bhi na rooyega to mar jaayega 
[zabt=patience]

 
Ab aur kya kisi se marasim barhayen hum 
Ye bhi bohot hai, tujhe bhool jayen hum 
[Marasim = Relationship] 

Sehra-e-zindagi mein koi doosra na tha 
Suntay rahe hain aap hi apni sadayen hum 
[Sehra = Desert] 

Is zindagi mein itni faraghat kisse naseeb 
Itna na yaad aa ke tujhe bhool jayen hum 

 
Huwi hai shaam to ankhon mein bus gaya phir tu 
Kahan gaya hai meray sheher ke musafir tu
 
Mein jaan ta hoon ke duniya tujhe badal de gi 
Mein maan ta hoon ke aisa naheen bazahir tu
 
Bicharna hai to hansi khushi se bichar ja 
Yeh kya sochta hai har muqaam peh aakhir tu 

Faraz tu ne us mushkilon mein daal diya 
Zamaana sahib-e-zar aur sirf shair tu  

 
Usko juda huwe bhi zamaana bohot huwa 
Ab kya kahain ye kissa, puraana bohot huwa 

Dhalti na thi kisi bhi jatan se shab-e-firaq 
Ay marg-e-nagaahaan tera aana bohot huwa 
[Shab-e-Firaq = Night Of Separation] 
[Marg = Death] 

Hum khuld se nikal to gaye hain par ay khuda 
Itne se vaakiye ka fasaana bohot huwa 
[Khuld = Heaven] 

Ab hum hain aur saare zamaane ki dushmani 
Usse zara rabt barhaana bohot huwa 
[Rabt = Relation] 

Lo phir tere labon pe ussi bewafa ka zikr 
"Ahmed Faraz" tujhse kaha na, bohot huwa