Lamento de Galadriel
Ai!
Laurië lantar lassi súrinen!
Yéni únotimë ve rämar aldaron,
yéni ve lintë yuldar vánier
mi oromardi lissa-miruvóreva
Andúnë pella Vardo tellumar
nu luini yassen tintilar i eleni
ómaryo airetári-lírinen.
Sí man i yulma nin enquantuva?
An sí Tintallë Varda Oiolossëo
ve fanyar máryat Elentári ortanë,
ar ilyë; tier undulávë lumbulë,
ar sindanóriello caita mornié
i falmalinnar imbe met, ar hísië
untúpa Calaciryo míri oialë.
Sí vanwa ná, Rómello vanwa, Valimar!
Namárië! Nai hiruvalyë Valimar.
Nai elyë hiruva. Namárië!
(LtR I-445)
Poema de Markirya
Men cenuva fánë cirya
métima hrestallo círa,
i fairi nécë
ringa súmaryassë
ve maiwi yaimië?
Man
tiruva fána cirya,
wilwarin wilwa,
ëar-celumessen
rámainen elvië
ëar falastala,
winga hlápula
rámar sisílala,
cálë fifírula?
Man
hlaruva rávëa súrë
ve tauri lillassië,
ninqui carcar yarra
isilmë ilcalassë,
isilmë pícalassë,
isilmë lantalassë
ve loicolícuma;
raumo nurrua,
undumë rúma?
Man
cenuva lumbor ahosta
Menel acúna
ruxal' ambonnar,
ëar amortala,
undumë hácala,
enwina lúmë
elenillor pella
talta-taltala
atalantië mindonnar?
Man
tiruva rácina cirya
ondolissë mornë
nu fanyarë rúcina,
anar púrëa tihta
axor ilcalannar
métim' auressë?
Man cenuva métim' andúnë?
(MC 213)
Naire Eldingolemon
Ai! ana i dôl, pella i osto
ambossë, sinome feanya caitas.
Luin ehtelë, ataquë i culuina
ve tier telpe ar taurë laiqua.
Eruva ainan coan, ortanyë camnyar,
nai encenuvanyë?
Namarië tenna enomentielma!
aina coa, namarië! feanya, namarië!
(Eldingolemo)
N.B. Si
tienes más textos en Quenya, si quieres, mándamelos para hacer más grande este
sitio o si quieres dime dónde los puedo conseguir o si quieres publicar uno
tuyo mándamelo y pongo tu nombre o la fuente y un link a tu sitio si tienes
Muchas gracias.