Balik-Aral, Balik Sigla          

Erwin Puhawan, Pambansang Tagapangulo - KAMPI

     Madaling sabihin kung ano ang mali pero mahirap hanapin kung ano ang tama. Ito ang mga katagang magpapaliwanag sa atin kung bakit nasa sitwasyon tayo ngayon ng istagnasyon. Ito rin ang mga katagang magbibigay hustisya kung bakit ganito ang tema natin ngayon, ang BALIK-ARAL, BALIK-SIGLA.

     Hindi tayo nagkamali sa pagbasura sa oryentasyon ng lumang aktibismo at palitan ito ng bago at napapanahong oryentasyon upang muling buhayin ang kilusan ng kabataang estudyante. Hindi rin tayo nagkamali na ibaon sa limot ang mga maling istilo at sistema ng lumang aktibismo na siyang nagiging dahilan ng "alienation" natin sa malawak na masang estudyante. At higit sa lahat, tama lang ang ating mga kritisismo sa mga teoryang gumagabay sa lumang kilusan ng kabataang-estudyante.

      Pero hindi lahat ng luma ay mali! Hindi porke sinabi nating mali sa ngayon ang mamundok ay hindi na tayo makikisalamuha sa batayang masa. Hindi porke mali ang ideolohiya ni Mao Tse Tung ay hindi na tayo mag-aaral ng iba pang ideyolohiya tulad nila Marx, Lenin at Engels. Ang sabi natin ay iwasan ang mga pagkilos na mapapasama ang imahe ng aktibismo pero hindi natin sinabi kahit kailanman na huwag tayong maging militante. Hindi porke natatakot ang maraming bilang ng estudyante sa mga radikal ay ikukubli na natin ang ating mga radikal na panawagan. Hindi porke sinabi natin na tapos na ang papel ng kilusang estudyante bilang propagandista ay hindi na tayo magpo-propaganda sa mga pang araw-araw na isyung lokal at nasyunal. Mali ang blind obedience pero hindi natin sinabing wala na tayong disiplinang susundin. Ang mali ay ang magsakripisyo sa maling paniniwala at prinsipyo pero hindi natin sinabing wala na tayong konsepto ng sakripisyo. Ang sinasabi natin ay hindi magtatagumpay ang ating ipinaglalaban sa simpleng sipag at tiyaga sa pagkilos pero hindi natin sinabing hintayin na lang natin ang sitwasyon at magpapetiks-petiks na lang tayo. Hindi porke mali ang banggardismo ay hindi na natin pamumunuan ang pakikibaka ng estudyante't sambayanan.

      Isa ito sa magpapaliwanag kung bakit ang lumang aktibismo sa ngayon ay nananatiling nakatindig at unti-unti ang kanilang paglakas. Dapat nating kilalanin na sila sa ngayon ang nangungunang pwersang pampulitika sa kabataang estudyante. Bakit? Hindi dahil sa sila ang tama at tayo ang mali tulad ng ipinangangalandakan ng kabilang grupo. Masyadong simplistiko ang ganitong pangangatwiran. Dahil kung totoong sila ang tama ay umaagos na sana ang kilusang estudyante sa ngayon sa lawak ng impluwensiyang inabot nila matapos ang EDSA 2. Kung tama ang kanilang linya ay nahikayat na sana nila ang libu-libong mag-aaral nitong pasukan na mag-boykot ng klase laban sa TFI. Kung wasto ang kanilang mga pamamaraan ay na-sustain sana nila ang ROTC struggle sa kasalukuyan at nakapagparali ng libu-libo sa kongreso nitong nakaraang SONA. Pero hindi ito nangyari at ang lahat ay ningas-kugon lamang dahil nga sa luma nilang oryentasyon at maling linya't taktika at paulit-ulit na mabibigo ang grupong ito hangga't hindi sila magwawasto sa kanilanga kamalian.

      Ngayon balikan natin ang usapin na anong meron ang grupong ito kung bakit sa kabila na kanilang mga kamalian ay tindig labuyo pa rin? Ito ay dahil may mga wasto sa luma at nakagawian na. Bagama't trahedya ang naganap na kasaysayan ay maling sabihin na wala na tayong mapupulot na positibong aral mula dito. Ang determinasyon, sigasig, dedikasyon, sakripisyo, disiplina, sipag, tiyaga, liksi, lalim, simpleng pamumuhay at komitment ay ilan lamang sa mga luma na magpasahanggang ngayon ay taglay ng kanilang mga aktibista. Mali man sila sa maraming bagay ngunit hanggat naririyan ang mga lumang katangian na nabanggit sa itaas ay mananatiling nakatindig ang lumang kilusang ito.

      Dito sa aspetong ito tayo tinatalo ng RA. Hindi man tayo talo sa tamang linya at prinsipyo, hindi man tayo talo sa tamang linya at prinsipyo, hindi man tayo talo sa mga panawagan at islogan, sa talas ng pagsusuri, talim ng ating linya at marka ng mga pagkilos pero hanggat hindi natin nasasapul ang tamang kumbinasyon ng luma at bago ay mabibigo at mabibigo tayo. Tama man tayo sa maraming bagay ngunit mali naman tayo sa aktitud ay wala rin tayong patutunguhan. Tandaan natin na anumang "social theory" gaano man ito kawasto hanggat hindi niyayakap ng malawak na bilang ng masa ay hindi pa pupwedeng tawagin at itanghal na "social science". Ganito ang nangyari sa ating panawagan na RESIGN ALL na tama pero bigo samantalang ERAP RESIGN ay mali pero nagtagumpay. Sa biglang tingin ay "absurd" ang pormulasyong ito pero ang dapat makita natin ay tinalo ng huli ang una na maipaabot ng malinaw sa masa ang mensahe. Tinalo sa halos lahat ng porma ng pagpapaliwanag sa masa at isa na dito ay ang sinasabi natin kanina pa. Ang mga lumang tradisyon ng pagkilos na magpasahanggang ngayon ay isa sa susing kawing sa ikakatagumpay ng anumang plano. ANG TAMANG AKTITUD SA PAGKILOS.

      Kaya't kung gusto nating lumakas, kung gusto nating sumigla, kung nais nating magtagumpay, balik aralan natin ang nakaraan at humalaw ng positibong aral mula dito na siyang magsisilbing gabay at inspirasyon sa ating pagkilos. Marami na tayong naisip na mga bagong porma at konsepto sa aktibismo, ang kulang na lang ay pagsanibin ito kasama ng ilang mga positibong aral mula dito na siyang magsisilbing gabay at inspirasyon sa ating pagkilos. Marami na tayong naisip na mga bagong porma at konsepto sa aktibismo, ang kulang na lang ay pagsanibin ito kasama ng ilang mga positibong aral ng lumang aktibismo. Mga kasama! BALIK-ARAL, BALIK-SIGLA!
Ano ba ang dapat pagbalik-aralan?

1. Halaga ng pagpapalalim sa kamulatan at pag-aaral sa lipunan at pakikibaka.
2. Halaga ng pakikisalamuha sa batayang masa.
3. Halaga ng arawang pagmumulat at propaganda
4. Halaga ng pag-oorganisa.
5. Halaga ng rekrutment ng mga aktibista.
6. Halaga ng pagiging lider at modelo.
7. Pamumuno sa mga kampanya at pakikibakang masa.
8. Pagkakaroon ng disiplina.
9. Trato sa mga kasama.
10. Hinggil sa sakripisyo.
11. Hinggil sa relasyon.
12. Pakikitungo sa masa.

      Ang lahat ng ito ay tatalakayin natin sa bawat kasama bilang bahagi ng reoryentasyon. Hindi kami naniniwala na sa isang iglap ay magbago na tayo ngunit isa ito sa mapagpasyang hakbang upang manumbalik ang sigla ng bagong aktibismo.

      Kailangan ding magkaroon ng organisasyunal na hakbangin na mag-uugnay sa pagitan ng nasyunal at lokal. Ito ay sa pamamagitan ng pagbubuo ng leadership body na involved ang local chapters. (Talakayin ito ng detalyado)

      Pagbubuo ng mga balangay at paglulunsad ng mga lokal na activities.

      Kailangan din nating magkaisa kung ilan ang ilalawak natin bago matapos ang semestre.

      At ang pagkakaroon ng ED campaign sa ARAK at Globalisasyon.