Septiembre, el primera mes del mga “bre’s”
Octubre, el mga genti alegre ya!
Ta pensa ya nisos el mes de Noviembre
Talyi ya el mga Fiesta,
Fiesta del Muerto
Fiesta del Ciudad
Para de Señora dela Soledad

Cerca ya din el mes de Diciembre
Ta llega ya el mas alegre mes delos “bre’s”
Ta celebria el nacimiento de Dios Jesucristo
El dia de Pascua como Fiesta
Olor del mansanas y naranjas nisos ta ole ya

Ta sinti ya din nisos
Tiene ba ya salva sen na bolsa?
Ta llega ya el Pascua
Talyi ya rin el Año Nuevo
No ma ta para el mga celebracion
Y gastos todo-todo
Pero para conmigo
Este el mga meses bien de todo

Todos los Santos!
Delante ta culda yo
El primero dia de Noviembre
Na pantiong ta anda niso
El mga nicho que sucio
Nisos di limpia y pinta blanco
Cabando de mira limpio

Llegando el siguiente dia
El mga genti ta anda ya na cementerio
El cementerio qui diquel quieto
Este un dia… muy alegrio

El lugar ta brillar
Con luz y candela ardiente
Olor del popcorn y chicharon
Lobos de colores y otro-otro juguetes
Alya na cada canto
Ilos ta vendi, el modo alegrio!

Cabando el visitacion y corto oracion
Alya naman na Samonte Park
Cerca na Carnaval o Feria
El mga genti ta anda
Nisos tiene mucho diversion
Entonces este el primera dia
Ta sinti niso todos ta qui ya el Fiesta.

Cuanto Fiesta ba niso tiene
Yo ya pregunta?

Ika dos Domingo del Noviembre
Niso di celebra
El fiesta de niso Santa
Señora dela Soledad

Ta puni ya na calle
El mga banderitas de colores
El banda de musico ta prepara ya
Vini Domingo, ilos di toca
El musico del Fiesta
Mi Amigo, mi amiga ta aqui ya

Sabado, visperas del fiesta
El dia mas sabroso recuerda
Carne del baca, puerco y gallina
Comida de Cucina Chabacano
Yo ya saboria, olor de comida
Na todo casa de niso ta prepara.

Llegando el dia Domingo, Fiesta!
Alas ocho de temprano
El lechon ta cusi ya
Banda del musico ta toca pa!
Alya na Calle Real
Mga visita ta camina
Con ilos quien ya imbita
Na mga casa-casa, ilos ta anda

La mesa lleno de comida
Botella de vino y San Miguel beer
Mucho cuentos y risas
Con todo el aploso
Como nuay mas mañana
Cuando el Fiesta de niso ta celebria

Llegando el noche ta brilla
Alya na Carnaval niso ta anda
El mga otro talya na aplaya
Embraso el novio o novia
Ta sunia abajo del luna
Adentro del cielo azul claro

Ya embarka na Feria rueda
Cabando ya huga el roleta
Juguete y ramienta de cocina
Baso, plato y tasita
Ganancia no el razon porque niso alegre
Despues el Pascua, que mas alegria!

El mga luces y rebentador
Ta dale vendi ya na mga tienda
Ta sinti y pinsa ya nisos
Pascua y Año Nuevo
Nisos, no puede mas espera

Nuevo sapatos, pantalon y polo
Di cumpra ya mi Nana
Para yo di usa
Vini dia de Pascua

Otro ya el clima y viento
Ta sinti frio ya
Pono de Pascua, mga luz y parol
Con otro caricatura pa
Ta adorna ya cada un casa

Llegan el Noche Buena
Otra ves lleno el la mesa
Tiene mucho frutas, hamon y queso de bola
Café caliente o chocolate
Misa de Gallo o Simbang Gabi
Puto Bumbong, suman y bibingka
Tiene pa tsaa caliente

Mismo dia de Pascua
El mga Niño y Niña
Con todo nuevo el mga ropa
Ta camina ya para anda
Di pidi aguinaldo
Con mga padrina y padrino

No lang el mga Niño y Niña
El ta celebria el dia
Talyi din el mga genti Viejo
Un grupo talya na canto
Tiene un pityel y baso garando
Cinco de dos docena de beer
Tagay-tagay alya na canto.

Como nuay ma mañana
Yo ta recorda…
Un semana ya lang…
Año Nuevo ta aqui ya

A trenta’y uno del Deciembre
Alya na mi Cuidad querida
El ruido del rebentador
Palanggana y maracas
O cosa-cosa pa
Para mas ruidoso el sonata

Talyi pa el mga luces y kuwitis
Ta brilla bueno ariba del cielo
Con todo el humo abajo, niso ta espera
El Media Noche de pasa ya
Para saludar el Año Nuevo

Ensima de la mesa
Comida del rico otra ves
Y muchas beses
Una ves mas yo ta recuerda
Na tras o prente de casa
Barbeque ta cusi pa!

O Dios mio, yo quiere ya retira
Na mi nacido lugar, mi Cuidad querida
Para savoria otra ves
El mga Fiestas mucho recuerdos