Quant li arcevesques l’ot
A un parlement cummun
En sentence tuz enclot
Sunt li dui roi e si barun.
Clers e lai, nuls ne esparnie. Grant
parole i fu meüe,
En sa escuminaciun tuz lie
Mais l'onur Deu i fu teüe,
K’a sa gent u possessiun
Sul li arcevesque Thomas
Funt mal u destrucciun.
L'onur Deu ne ublie pas,
Dunt par trestute la curt
Grant estrif e noise surt.
Li apostoilles ad
grant angoisse,
Suz ciel ne siet ke faire puisse.
E li messager [au] cuntraire,
Ore funt un, ore funt el traire.
Mut avroit en quor pesance
S’il curuçast le roi de France
E des Franceis la commune.
Cest est de dous parties la une,
Mes ceste requiert dreiture,
Lei e leauté e mesure.
D’autre part li rois Henris,
De terre, de aveir poestifs,
Ove ses evesques e ses clers
Est tut encuntre e en travers.
Si li rois ne se entremette
Lowis, ne siet quant pès i mette,
Kar mult est de descreciun,
De mesure e de grant resun.
Li apostoilles au
roi de France
Mande cum en lui ad fiance
K’il mette pès e amur
Entre le roi e sun pastur,
En tel furme e en tel guise
Ke honur i eit seinte Iglise,
Quant [li reis] la requeste entent,
Mult la li grante bonement,
Il i mettra peine e cure;
Tant frad d’ambes parz mesure
Ke mult ert purvers e engrès
[Cil] en ki remeindra la pès.