|
தாய்மொழி பற்றின்றி வாழும்
தரமிலாத் தமிழனே போ! போ!
தாய்மொழிக்கு உயிரையும் கொடுக்கும்
தன்மானத் தமிழனே வா! வா!
அந்நியர் கலையினப் போற்றி
ஆடிடும் தமிழனே போ! போ!
கன்னித் தமிழ்கலை போற்றிடும்
கண்நிகர் தமிழனே வா! வா!
சாதிகள் பேசிடும் அற்ப
சாக்கடைத் தமிழனே போ! போ!
நீதியின் வழியிலே உய்யும்
நேரிய தமிழனே வா! வா!
அஞ்சியஞ் சியேதினம் வாழ்வில்
அமிழ்ந்திடும் தமிழனே போ! போ!
துஞ்சி மடிந்த போதினிலும்
துவண்டிடாத் தமிழனே வா! வா!
விதிபடி வாழ்வென்று சொல்லும்
வெறுமதி தமிழனே போ! போ!!
மதியினால் விதியினை வெல்லும்
மறத்தமிழ் மறவனே வா! வா!
காட்டிக் கொடுத்துயிர் வாழும்
கழிசடைத் தமிழனே போ! போ!
தீட்டிய கத்திபோல் விளங்கும்
சீரிய தமிழனே வா! வா!!
பொய்க்கதை விரித்திடும் நெறியைப்
போற்றிடும் தமிழனே போ! போ!
மெய்க் கருத்திலங்கிடும் குறளை
விரும்பிடும் தமிழனே வா! வா!
மு. ஆசைத்தம்பி
உஙகள் கருத்துகளைத் தமிழில் தெரிவிக்க...
|